Раськень культурань институтонтень – 35 иеть!
Раськень культурань институтонтень – 35 иеть! Институтонь прявтось Елена Антипкина, преподавательтне ды студенттнэ арсизь тешкстамс кенярксчинть концертсэ, конась ульнесь лемтеме. Инжетненень эрявсь кочкамс тензэ лем, евтамс концертэнть шкасто эсь мелест. Икелепелев евтатано, мельтнеде ульнесть кеменде ламо ды весе прасть вемельс: «Культура и вдохновение» лемесь сехте ладиця. Институтонтень поздоровонь евтамо сакшность ламо инжеть: МР-нь культурань, раськень политикань ды архивень тевень министрань полавтыцясь Юлия Елисеева, проректорось Алина Маслова, икелень директорось Татьяна Сидоркина, содавикс преподавателесь Наталья Воронина ды ламо лия. Паро валсо ледстязель раськень культурань факультетэнь панжицясь, васенце деканось Василий Сергеевич Брыжинский, конась весе седейсэ палсь теке эсь эйкакшонзо кис. Ледстязельть Институтонь лия преподавательтнень леместкак, конатне уш тусть эрямостонть, ансяк сынст тевест эри студенттнэсэ, сынст содамочитнесэ ды Институтонть тевтнесэ. Концертэсь ушодозель эрзянь моросто. Теде мейле невтезельть раськень киштемат. Сындест ульнесть пек ламо, весе тейтертне-цератне оршнезельть раськень оршамопельсэ ды дивавтсть эсь докачисэст. А вана зярдо «Выйду ночью в поле с конем» моронть серьгедизь «Разгуляй» казаконь моронь ансамблянь морыцятне – Институтонь икелень студенттнэ – залось дивазевсь. Вана те вайгелень вий! Алкукскак паро казне, конась токинзе весень седеест! Тешкстама, кенярксчинть лувсо истя жо ютась «Символический капитал традиционной культуры: опыт прошлого в моделях будущего» весероссиянь научно-практической конференциясь ды важодсь «Учитель и ученик» выставкась. Марина Девятова