Жазылыу-2026 — 14 июня 2026 г. в 14:34:05.531
Жазылыу-2026 «Халкъны намысын кётюрген кеси да намыслы болады» Малкъар тилде «Заман» газет десек, миллетни, аны тарыхыны, маданиятыны, адет-тёресини юсюнден айтабыз. Миллет газетибиз деген сёз тутуш, сёзсюз, мен таулума деген адамны жюрегин къууандырмагъанлай, ёхтемлендирмегенлей къоярыкъ тюйюлдю. Зарфха урулуп тургъан газетибиз бизни бирси халкъла бла тенг этген тарых магъаналы шартды. Таугъа миннген тауча бийик болады, дейдиле халкъда. Бийикди миллет газетибизни сыйы, сора ол кеси да тамблагъы кюнюбюзню ышаныулугъуну энтта бир белгисиди десем, жалгъан сёз боллукъ тюйюлдю. Малкъар халкъны тилини сакъланыуунда, айныуунда да бюгюнлюкде «Заманны» борчу уллуду. Аллахха шукур, ол борчну газетибиз сыйы-намысы бла толтуралады. Газетге жазылыу, аны тиражын, окъуучуларыны санын ёсдюрюу а битеу миллетни борчуду. Иги газет, аны къадарына уллу кёллю болмау, кёп окъуучу – аладыла ёз тилибизни сакълар, айнытыр да мадарла. Жазылыу кампаниядан бир жанында къалмагъанлай, «Заманны» арбазына келирча этген таулу уа кесини халкъыны халкълыгъын сакълауда ахшы атлам этеди. Жюз жылдан артыкъны тохтамагъанлай, жамауатны къолунда жюрюп келген газетибиз бюгюн да ол жоругъун тюрлендирмезге тийишлиди. Аны алай этер ючюн а, хар бирибиз къайгъырыргъа керекбиз, жазылыргъа, алыргъа, окъургъа. Дагъыда бир айтырыгъым, сагъыш этчигиз, газетде басмаланнган кесибизни юсюбюзден ол къадар материалны сиз дагъыда къайда окъургъа боллукъсуз?! Жууабы бирди – бир жерде да угъай! Ол шарт окъуна кёллендирирге тийишли сунама хар бирибизни да жазылыу кампаниядан бир жанлы болмазгъа. Деменгилиди малкъар халкъ, буруннгу тарыхы, маданияты бла. Келигиз, дуния уллулукъда кесибизни сакъларгъа итинейик да, «Заман» газетге жазылыуда ышаннгылы атламыбызны этейик. Аны бла биз кесибизни сыйыбызны, даражабызны бийик этерикбиз. Барыбыз да билгенибизча, халкъны намысын кётюрген а кеси да намыслы болады. Тетууланы Хадис, «Къайсыннга жюз атлам» фондну таматасы, тарыхчы. Бизни индексибиз – П5893