Насыпха къонакъбайлыкъ этгенле — 7 июня 2026 г. в 14:02:39.112
Насыпха къонакъбайлыкъ этгенле Ишни юсю бла Кичибалыкъ элге баргъаныбызда, биз огъурлу, кенг жюрекли адамланы юйлеринде да болгъанбыз. Ала уа Улбашланы Алий бла Анютадыла. Алгъадан белгилесек, ала юйюр къурап, бирге жашагъанлы энди 52 жылдан атлагъанды. Беш сабийни ёсдюрюп, онсегиз туудукъгъа, аладан туугъан да сегиз жашчыкъгъа бла къызчыкъгъа къууана, алай жашайдыла. Баям, биз бирде айтыргъа да болурбуз: узакъ тау элде жашау этген къыйынды деп. Болур алай да. Болсада бу адамланы арбазларына киргенибизде окъуна, мында ишни сюйген, аны магъанасын да ангылагъан инсанла жашагъанлары сезилип эди. Тазалыкъ бла низам а, анда абаданла угъай, жаш адамла турадыла деген сезимге келтиргендиле. Арбазны ала, мында от тюшюп, аллай жарсыудан сора жангыдан тапландыргъанларын билгенибизде уа, былайда кертиси бла да чынтты иш кёллю таулула жашайдыла деген сагъыш бютюнда кючленнгенди. Алий атасы Батокъаны уллу юйюрюнде ёсгенди. Улбашлары Огъары Малкъардан эм алгъа Хабазгъа кёчген эдиле. Ары уа Батокъаны атасы Аслан-Мырза келгенди биринчи болуп. Аслан-Мырза таза диннге бек ийнаннган адам болгъанды. Айтылгъан хапаргъа кёре, аны арбазында 22 кере бешик къурманлыкъ болгъанды. Алай эсе да, аланы жаланда онусуна берилген эди ёмюр. Аладан бири болгъанды Батокъа. Хабаздан Кичибалыкъгъа уа юйюр озгъан ёмюрню алтмышынчы жылларында кёчген эди. Алий Къазахстанда туугъан тёлюбюзденди. Мектепге да ол анда барып башлагъанды. Юч классны бошагъандан сора уа, малкъар халкъгъа туугъан жерине къайтыргъа эркинлик берилген эди. Быллай аламат юйюрню юсюнден газетде окъургъа боллукъсуз.