Пушкинни кюню: орус тилни бла адабиятны байрамы — 6 июня 2026 г. в 10:03:16.186
Пушкинни кюню: орус тилни бла адабиятны байрамы Алтынчы июньда Александр Сергеевич Пушкин туугъанлы 227 жыл толады. Жыл сайын бу кюнде битеу Россейде поэтге аталгъан ишле къураладыла. Быйыл да школлада, китапханалада, поэтни эсгертмелерини къатларында Пушкинни назмулары айтыладыла. Шёндюгю адабият орус тилни мурдорун салгъан Пушкинни туугъан кюню битеу дунияда Орус тилни кюнюдю, бу оноуну ООН-ну департаменти 2010 жылда этгенди. ООН-ну къырал даражада тилни – ингилиз, арап, испан, къытай, орус эм француз – хар бирини энчи кюню барды. Къытай тилни кюню 20 апрельдеди, бу кюнде къытай жазманы мурдорун салгъан Цан Цзе туугъанды. Ингилиз тилни кюню Уильям Шекспирни туугъан кюнюдю. Испан тилники уа Сервантесни ёлген кюнюдю. Россейде уа алтынчы июнь Орус тилни кюню боллугъуну юсюнден буйрукъну 2011 жылда Россейни Президенти Дмитрий Медведев чыгъаргъан эди. Белгилисича, арт отуз-къыркъ жыллада орус тил жюрюген жерле азайгъандыла. Хар къырал кесини тилин жаяргъа кюрешеди. Болсада орус тил бир тамырланнган жерден артда кетмейди, нек дегенде бу тилде адабият жер башында бек кючлюге саналады. Европада Библиядан сора бек кёп окъулгъан китапланы тизмесинде экинчи жерни Достоевскийни китаплары аладыла. Чехов а театрлада бек кёп салыннган авторладан бириди. Толстойну, Булгаковну, Бунинни эм башха жазыучуланы билмеген хазна адам жокъду.