Адабиятны ариу мекямында — 7 июня 2026 г. в 09:16:06.525
Адабиятны ариу мекямында Хочуланы Фатимат Мухтаровна бла Тохаланы Светлана Аптовна кёпден бери да Элбрус районну библиотека арасында ишлейдиле. Бюгюнлюкде Фатимат Мухтаровна район ара библиотеканы таматасыды. Светлана Аптовна уа библиографды. Озгъан ыйыкъда библиотекагъа барып, алагъа жолукъгъан эдим. Бет жарыкълы адамла, хар келгеннге ариу тюбейдиле. Китапхананы ичи да таза, китапла тапкалагъа ариу тизилип, излеген чыгъармангы къыйналмай табарыкъса. – Мында отуз мингден артыкъ китап барды, – дейди Фатимат Мухтаровна. Бири да окъулмай къалмагъанды, хар бирини кесини окъуучусу. Сабийле школ программагъа кёре излейдиле чыгъармаланы. Аладан таматаракъла уа детектив, фантастика сорадыла. Абаданыракъла уа орус эм тыш къыраллы классиканы,бирлери уа бу жерли авторланы китапларын аладыла. Светлана Аптовна районда библиотекачыла бла дайым байламлыкъ жюрютеди. Ишлерин къалай тап бардырыргъа кереклисини юсюнден айтады. Тюрлю-тюрлю тюбешиуле, кёрмючле къураргъа болушады. Кёп болмай бу библиотекада Россейни халкъларыны бирликлерине аталгъан китап кёрмюч болгъанды. Анда кёп авторланы китаплары кёргюзтюлгенди, ол санда бизни жазыучуланы да. – Биз мында тюбешиуле да къурай турабыз. Алагъа районну библиотека арасыны директору Тебердиланы Лейла да келиучюдю. Бу ишде аны сынауу бизден да уллуду. Ол болушуп къурагъан тюбешиулерибиз бютюн сейирлик болуучудула, – дейди ушагъыбызда Фатима Мухтаровна. Библиотеканы бир жанында уа кинозаллары да барды. Китап алыргъа келгенле анда сюйген киноларына къарап кетедиле. Бош заманларын орамлада ётдюрмей, алайда киногъа къараргъа сюйгенле да аз тюйюлдюле. Ол да жаш адамгъа билимин ёсдюрюрге себепликди. Тырныауузчула билимге не заманда да уллу эс бургъандыла. Араларында кёп белгили жазыучула, назмучула, жырчыла да бардыла, ол санда Отарланы Сайидни айтыргъа боллукъду. Биз баргъан районну ара библиотекасы аны атын жюрютеди. Быллай китапхана болгъаны битеу районнга, миллетге, республикагъа да магъаналыды. Жууукъ заманда мында назмучу Ёзденланы Женя эм къауум белгили спортчу бла тюбеширге деп турадыла.