Оюм — 21 июня 2026 г. в 13:05:59.251
Оюм Газетибиз – тарых нёгерибиз Жазылыу кампанияны кезиуюнде Тырныауузда Отарланы Омарны атын жюрютген музейни тамата илму къуллукъчусу Ахматланы Заурбек кесини оюмун айтады: – «Заман» газетге кесим дайым жаздыргъанымдан сора да, танышларыма, жууукъларыма, тенглериме да аны миллетибизге магъанасыны юсюнден айтып ангылатама. Кёбюсю ангылайдыла, жаздырадыла, алай, жарсыугъа, арабызда: «Тилни иги билмейме, окъуйма десем а, ангыламайма кёп затны, тилманч керек болады», - деп, сылтаула этгенле да тюбейдиле. Ма аллайланы хаталарындан тилибиз унутула, жокъ бола барлыкъды. Ана тилибизде чыкъгъан газетге, журналлагъа жазылыуну, китапланы окъууну, малкъар театырыбызгъа барып, сахна оюнларына къарауну магъанасы миллетибизге бек уллуду деп, мен алай санайма. Аласыз тилибиз, тарыхыбыз да тас болуп къалыргъа уллу къоркъуу барды. Бюгюнлюкде, Аллахха шукур болсун, ана тилибизде газет, журналларыбыз да дайым чыгъадыла. Баям, бир къауумла анга уллу кёллюлюк аны ючюн эте болурла. «Къайры кетерикди, чыкъмай не амалы барды», - деп келе болур кёллерине. Анга жаздырмасакъ, бир кюнде чыкъмай къалыргъа да болурла. Ол заманда «башыбызны къашырбыз», алай кеч болур. Тарыхдан устаз болуп ишлегенимде, газетде билим бериуню, устазланы юслеринден жазылгъаннга энчи эс бургъанма, энди асламысында тарых бла байламлы материалланы окъургъа сюеме. Газетде чыкъгъан не гитче билдириуню да тинтеме, дурус кёрсем, ишимде хайырланама. Газетде эртте басмаланнган материалланы хайырындан кёп ахшы, фахмулу, айтхылыкъ адамларыбызны юслеринден билгенбиз, тарыхны юсюнден да кёп жазылгъанды. Бир амал бар эсе, аллай материалланы жангыдан басмалай турсагъыз, бек ыразы этериксиз. Мен ангылагъандан, бюгюннгю окъуучуларыбыз да бек ыразы болуп окъурукъдула отуз, къыркъ, элли жыл мындан алгъа болгъан затланы юслеринден. Эски эллерибизни суратларын кёрюрге да ким да сюерик сунама.