Маданият юйню бир кюню — 18 июня 2026 г. в 09:30:19.192
Маданият юйню бир кюню Быллым элни ортасында эки къатлы Маданият юй. Арбазы кенг, таза. Тыш эшикни ачып, биринчи отоугъа киргенлей, кесими бир аламат сейирлик музейде болгъан сундум. Алайда таулу кийимледен башлап ат арбагъа, сабий бешикге, от жагъагъа дери таулу жашауунда хайырланнган кёп затла бардыла. Бери жанында чертлеуюк чыбыкъдан эшилген чалман. Аны юсюнде – эчки териден тулукъ, гыбыт. Буруннгуда биринде мирзеу тутхандыла, экинчисинде уа – суусап. От жагъаны бери аллында уа узун юч айыр агъач сенек. Мен да алагъа къарай тургъанлай, Маданият юйню директору Байзуллаланы Джамиля келди. «Малкъар халкъны къыраллыгъы къайтарылгъан кюннге аталып кёрмюч къурагъан эдик. Бу затланы бир къаууму кесибизде да бар эди. Бир къауумуна эллиле келтиргендиле. Былагъа къараргъа бек кёп адам келген эди», - дейди ол. Биз да кёрмючню юсюнден айта тургъанлай, бирси отоудан къобуз, дауурбас тауушла чыкъдыла да, ары ётдюк. Маданият юйню эм уллу отоуунда, тал чыбыкълача субай ариу къызла, жашла тюз тепсеуню тепсей тура эдиле. Къолларын аз-маз ёрге кётюре, ууакъ атламла этип, алгъа-артха барадыла. Бир кезиуде уа жерлеринде тёгерек да буруладыла. Дагъыда бир аздан къобузну, дауурбасны бирге къошулгъан тауушларына кёре бир ызгъа тизилип барадыла. Тилланы Борис бу кружокну таматасыды. Эки минг сегизинчи жылдан бери Тырныаууздан бери жюрюп, быллымчы сабийлени тепсерге юйретеди. Къобузчу нёгери Озарукъланы Роза да дайым биргесинеди. Ала ыйыкъгъа юч кере келедиле. Сабийлени къарачай-малкъар тепсеулеге юйретедиле. – Бизни кружокга отуздан артыкъ къыз, жаш жюрюйдюле, – дейди Борис. Школда дерслерин бошагъанлай, чабып, бери келедиле. Маданият юйню директоруну хайырындан кружокну бардыргъан жерибиз тазады, жылыды. Элни администрациясыны башчысы Тебердиланы Магомет да кезиуден кезиуге келе, ишибизге сакъ кёзден къарайды. Тилланы Борис а бу иш бла эрттеден бери кюрешеди. Тепсерге юйретген сабийле бла тюрлю-тюрлю даражада бардырылгъан эришиулеге, байрамлагъа къатыша турады. Алгъаракълада Тюркде, Татарстанда, Чувашда болуп, малкъарлыланы тепсеулерин кёргюзтюп, ол тийрелени адамларын сейирге къалдыргъандыла. Материал саулай газетде басмаланады.