Элим деген элине болушур — 6 июля 2026 г. в 09:27:30.785
Элим деген элине болушур Элледе почта бёлюмле бла редакция байламлыкъ жюрютгенлей турады. Ишибиз бир муратха бойсунады, бир борчну толтурабыз дерге боллукъду. Газетлени бла журналланы заманында окъуучулагъа келтиргенле, элледе жашагъанланы кёп жумушларын жалчытханла да аладыла. Къагъытланы, посылкаланы, телеграммаланы да иелерине жарсытмай жетдире, аладан ыразылыкъ табадыла. Ахыр жыллада уа коммунал жумушланы хакъын да почта бёлюмледе тёлер онгла къуралгъандыла. Бедик Элбрус районну гитче эллеринден бириди. Анда жашау табийгъат жаны бла аламат болса да, эллилени биз башда санай келген керекли жумушларын, район арагъа жюрюмей, кеслеринде почтада жалчытыр онглары болгъаны аламатды. Элни ортасы бла озгъан маршрутдан башха эл бла Тырныаууз шахарны арасында энчи маршрут улоу жокъду. Аны да эсге ала, почта бёлюмню жамауатны эм керекли, эм магъаналы жумушларына къараялгъаны ахшыды. Бедикни почта бёлюмюнде Къулийланы Зухура кёп жылдан бери бет жарыкълы урунады. Ол элде хар юйюрге жууукъ адамча, къаршы ахлуча болгъанды. Зухура почтальон болуп ишлегенинде, эллилерин барын да танып, ала бла ушакъ эте, жарсыуларын, къууанчларын да биле тургъанды. Бир къауум жылдан бери ол почтаны таматасыды. Жарсыугъа, штатны къысхарта баргъанлары ючюн, бусагъатда таматалыкъ, почтальон ишни да бирге бардырады. Аны не жаны бла да жууаплылыгъын а энчи чертирчады. Кюн сайын эллилерини кёп сорууларына жолугъады, билгенича, къолундан келгенича алагъа сюйюп болушады. Аны оюмуна кёре, почта, жаланда билдириуле жетдирген ара болуп къалмай, жамауатны арасында байламлыкъ тутхан ызды.