Фахму жангылыгъы бла энчиди — 30 июня 2026 г. в 12:27:00.491
Фахму жангылыгъы бла энчиди Бир сейири, фахму деген, илхам деген зат къайда да, уллу шахарда, къумлада не тау орталарында ажашхан гитче элчикде болса да, кёзге урунмай, къууандырмай къоймайды. Басхан ауузунда Бедик элде жашагъан Хаджиланы Салима да аллай кёз да, жан да къууандыргъан ишле этген сабийледен бириди. Аны анасы Ёзденланы Танзиля юристди, алай а элде аллай усталыкъ изленнгени болмай, юйге, сабийлеге къарайды. Атасы Хызыр энчи иели иш бла кюрешеди. Ала юч къыз ёсдюредиле. Бу юйюрде ёсген къызчыкъланы адеп-къылыкъларына бюсюремеген жокъду тийреде, окъугъан школларында да. Юйюрде сабийлеге билим алдырыугъа энчи эс бёледиле. Ол бек игиди, алай а жашаугъа юйретиу аны бла чекленмегени белгилиди бюгюнледе. Бек керекли шартладан бири - сабийликден жашны, къызны да неге фахмусу болгъанын ачып, аны айнытыуду. Салима 7-чи классда окъуйду. Аны мураты – школну бошагъанлай, архитектура институтда билим алып, ол усталыкъ бла ишлергеди. Бюгюн а ол аламат суратлары бла къууандырады. Къарачыгъыз алагъа. Салима карандаш бла, къалам бла ишлеген суратла окъуна айтып турадыла къызчыкъны къаллай фахмусу болгъанын. Бек аламаты уа – бу суратлада жашау барды, кёзге жюрек сезим урунады. Неге эсе да сагъыш этип къарайды акъылман, закий Къулийланы Къайсын. Ол назмуларына кийирген ат, башын артха буруп, сакълайды. Нени сакълайды, нени кёреди? Сансыз а тюйюлдю къарамы. Жаулукъ къысып тургъан тиширыу гюлле бла жасалыпды. Баям, ол кёп ыразылыкълагъа тийишлиди. Жютюбурун къанатлыны минчакъ кёзюнде не эсе да бир соруу жууап излейди…