«Сакълауну бир кюню» — 14 июля 2026 г. в 10:57:51.676
«Сакълауну бир кюню» Орта кюн «Дея» кинотеатрда Беслан Закураевни «Сакълауну бир кюню» деген проектини чеклеринде алыннган къысха метражлы суратлау фильмини премьерасы ётгенди. Аны КъМР-ни Жаш тёлюню ишлери жаны бла министерствосуну грантына республиканы Кинематографистлерини союзу алдыргъанды. Премьерагъа миллетлени ишлери эм жамауат проектле жаны бла министрни къуллугъун болжаллы халда толтургъан Гергъокъланы Джамбулат, КъМР-ни муфтийини орунбасары Алим Сижажев, жамауат организацияланы, жаш тёлю эм жандауурлукъ биригиулени келечилери, аскерчиле да келген эдиле. Фильм энчи аскер операциягъа къатышханланы юйюрлерини юсюнденди. Ол СВО-гъа аталгъан башхалагъа ушамагъанын чертирчады. Мынга дери алыннганлада уруш аулакъладан кадрла бла информация аслам берилген эсе, бу проект а жашларын бла баш иелерин сакълагъан юйюрлени юслеринденди. Сёзсюз, аланы хар кюнлери да сакълауда ётеди. Ол сакълау къыйынды, къайгъылыды, жарсыудан толуду, кюнле айлагъа, жыллагъа ушайдыла... Режиссёр айтханнга кёре, быллай кино алдырыргъа аны эсине «Ийнаныулукъ отдан кючлюдю» деген волонтёр араны юсюнден радио бериуге тынгылагъандан сора келгенди. Ол ары барып, аны таматасы Светлана Погорелова бла ушакъ этеди. Андан сора режиссёрну эсине аппасыны Уллу Ата журт урушну юсюнден эсгериулери тюшедиле. Шёндю да «Хар не да фронтха, хар не да хорлам ючюн» деген сёзле бошдан болмагъанын хар бирибиз да ангылайбыз. Баш рольланы профессионал актёр усталыкълары болмагъанла ойнагъандыла. Жууукъ кезиуде аны россейли кинофестивальланы бирине жиберир муратлыдыла. Дагъыда аны школлада бла эл маданият юйледе кёргюзтюрюкдюле.