«Окъуучуну жюреги дерследе тынчлыкълы, ырахат болургъа тийишлиди» — 22 июля 2026 г. в 12:10:20.948
«Окъуучуну жюреги дерследе тынчлыкълы, ырахат болургъа тийишлиди» Бюгюнлюкде бизде, насыпха, сабийлеге жюреклерин ачыкъ сакълаялгъан устазла кёпдюле. Аллайладанды Тырныауузну Отарланы Керим атлы 1-чи номерли лицейинде математикадан окъутхан Непеланы Исмайылны къызы Сапира. Ол хазырлагъан кёп окъуучуу быйыл къырал сынаулада иги кёрюмдюле болдургъандыла. Сапира бюгюн бизни редакцияны къонагъыды. - Сапира Исмайыловна, онлайн дерследе башха шахарланы, миллетлени сабийлери бла ишлейсе. Ала бла тенглешдиргенде, бизни бюгюннгю сабийлерибиз къаллайладыла? - Билемисиз, мен ангылагъан бир ачыкълау болгъанды – сабийлени ич дуниялары алгъадан бирчады. Аны байыкъдыргъан, бузгъан да жашау болумладыла. Тенглешдирип айтханда, мени къууандыргъан бизни сабийледе алыкъа адет, намыс, тёре, абадан, гитче дегенча сёзлени магъаналы болгъанларыды. Нальчикде эксперт къауумда болгъаным себепли къырал сынауланы бардырыугъа къатышама. Бизни сабийлени башхалыкълары мында окъуна эсленеди. Устазлыкъ ишими биринчи Огъары Басханда башлагъан эдим. Андагъы сабийле уа бир тюрлю тенглешдириуге да келишмейдиле. Аламат къылыкълыла, уяла билгенле, гитчеле болсала да, айтхан, берген сёзлеринде тургъанладыла. Бу мен санай келген затла бизни таулу къылыгъыбызны энчиликлеридиле. Аны ючюн аламат сабийлерибиз, ышаныулу тёлюбюз ёседи деп, базынып айталлыкъма. Ушакъны саулай газетде окъургъа боллукъсуз.