«Бизге эм магъаналысы саусузну ыразы болуп кетиуюдю» — 14 августа 2026 г. в 11:51:31.883
«Бизге эм магъаналысы саусузну ыразы болуп кетиуюдю» Белгилисича, тишлени саулукълу болгъанлары адамны чархына да себепликди. Ариу эм саулукълу тишлеге ие болур ючюн не керек болгъанын тишлеге бакъгъан «Улыбайтесь, это сунна» клиникаланы таматасы Османланы Илиясны къызы Зухура бла ушагъыбыздан билгенбиз. – Зухура, бюгюнлюкде кесинги энчи клиникаларынг бардыла. Аланы ачаргъа къалай бла таукел болгъанса? – Хар жангы затда кесими сынаргъа бек сюеме. Къоркъмай муратла этип, алагъа жетерге итинип жашайма. Кёп болмай школ жылларымда классымдан бир тенгим сабий анкетасында сорууларына жууап этген жазыуларымы табып жиберген эди. Мен анда кесими уллу стоматология клиникам боллукъду, юч этажлы юй ишлерикме, кёп сабийим боллукъду, кесим да машина жюрютюрюкме, хаж къылыргъа да барлыкъма, сабийлериме да быллай атла атарыкъма деп, барын да жазып тура эдим. Жылла оздула, мен да ол жазыууму унутхан эдим. Бюгюнлюкде уа, жашауума къарасам, ол сабий муратларыма барына да жетгеними эслегенме. Аллахны ахшылыгъындан, кесими клиникам болду. Билим алыууму да бир да тохтатмайма. Терапевт тишчи болгъаным бла чекленмей, хирургиядан да билим алгъанма. Имплантологияны бла ортопедияны да тасхаларына дери юйреннгенме. Бусагъатда кесим протезле да жарашдырып салама. Быланы айта келгеним, врач ёмюр дуниясында билимин ёсдюрюрге керекди, кюн сайын айныгъан илмуда жангылыкъладан артха къалмазча. – Биринчи клиникангы къалай ачханса? – Москвада заманымда юйге бек тансыкъ бола эдим. Туугъан жериме, жууукъларыма. Таукел болуп къайтама да, Нахушев атлы орамда болжалгъа алып бир жерни, эки багъыучу креслодан башлайма. Бизнес-план жарашдырама да, айныууму сюземе. Ушакъны толусунлай газетни бетлеринде окъургъа боллукъсуз.