🎭Ньурба тыйаатырын быйылгы 61-с айар дьылын биир премьератынан Ньурба Малдьаҕарыттан ...
🎭Ньурба тыйаатырын быйылгы 61-с айар дьылын биир премьератынан Ньурба Малдьаҕарыттан төрүттээх, айылҕаттан бэриллибит кэрэ куоластаах уһулуччу талааннаах ырыаһыт Никииппэр Сэмиэнэп туһунан испэктээк буолуоҕа. 🎭Бэлэмнэнии үлэ чэрчитинэн тыйаатыртан сэттэ киһилээх айар бөлөх алтынньы 14 күнүгэр Малдьаҕарга баран кэллэ. Испэктээк режиссера, тыйаатыр уус-уран салайааччыта, СӨ ускуустубатын үтүөлээх диэйэтэлэ Юрий Макаров этэринэн, Никииппэр Сэмиэнэп туһунан туруоруу кэмэ кэлэн көрөөччү дьүүлүгэр тахсыахтаах уонна сайын Ньурбаҕа ыытыллар Саха сирин норуоттарын IX спортивнай оонньууларын култуурунай бырагырааматыгар киириэхтээх. 🎭Никииппэр Сэмиэнэп төрөөбүт, олорбут нэһилиэгэр тыйаатыр үлэһиттэрин Малдьаҕар нэһилиэгин дьаһалтатыттан баһылык солбуйааччыта Любовь Семенова, Никифор Семенов аатынан норуот айымньытын киинин уус-уран салайааччыта Виктория Васильева, бибилэтиэкэр Елена Иванова, норуот айымньытын киинин үлэһиттэрэ сахалыы сиэринэн итии чэйдээх көрүстүлэр. «Аргыс» ансаамбыл салайааччытын Иван Тимофеевы, уус-уран салайааччынан үлэлии сылдьан Никииппэри ыллыырга бастакынан көҕүлээбит Ольга Ушканованы уонна бииргэ ыллаабыт доҕорун Иван Ивановы кытта көрсүһүүгэ Никииппэр Сэмиэнэп туһунан интэриэһинэй түгэннэри, иһирэх ахтыылары иһиттибит. Көрсүһүү кэнниттэн Елена Никоновна ини-бии Донскойдар ааттарынан Малдьаҕар түмэлин көрдөрдө, нэһилиэк историятын, биллиилээх дьоннорун туһунан билиһиннэрдэ. Малдьаҕарга сырыыбыт оскуола үөрэнээччилэрин кытта профориентационнай ис хоһоонноох көрсүһүүнэн түмүктэннэ. Тыйаатыр кэлэктиибин аатыттан ыалдьытымсах Малдьаҕар дьонугар-сэргэтигэр махтанабыт!