ГБУ РС(Я) «Усть-Алданская Центральная районная больница»
Здоровье · 9 октября 2026 г.
Бүгүн В.А. Вонгродскай аатынан Дьокуускайдааҕы медицина колледжын Бороҕоннооҕу филиалыг...
Бүгүн В.А. Вонгродскай аатынан Дьокуускайдааҕы медицина колледжын Бороҕоннооҕу филиалыгар үөрүүлээх күн үүннэ - саҥа үөрэххэ киирбит устудьуоннары сүрэхтээһин буолла. Бороҕоннооҕу медколледж филиалыгар быйылгы үөрэх дьылыгар 39 устудьуон киирбититтэн, баһыйар өттө эдэр дьон. Олор истэригэр Ньурба, Амма, Мэҥэ Хаҥалас, Чурапчы, Кэбээйи улуустарыттан кэлбиттэр. Бороҕоннооҕу медколледж филиала аһыллыаҕыттан номнуо 15 сиэстэрэни уонна 16 фельдшери иитэн-үөрэтэн таһаарда. Бу исписэлиистэр улуус бары нэһилиэктэригэр тарҕанан үлэлии-хамсыы сылдьаллар. Бу маннык миэстэтигэр үөрэнэр элбэх үбү-харчыны эрэйбэтин, үөрэнэргэ табыгастааҕын көрдөрдө. Ол да иһин буолуо, быйылгы үөрэх дьылыгар элбэх киһи туттарыста. Үөрүүлээх тэрээһиҥҥэ улуус баһылыгын бастакы солбуйааччыта Семен Бурнашев, Мүрү нэһилиэгин баһылыга Прокопий Румянцев, Г.Г. Никифоров аатынан улуустааҕы киин балыыһа кылаабынай бырааһа Сергей Черкашин кыттыыны ылан устудьуоннарга алгыс тылларын анаатылар. Эмчит идэтэ улахан эппиэтинэһи уонна сыраны эрэйэр, дьон олоҕун быыһыырга анаммыт үрдүк анал. Онон идэлэрин толору баһылаан, ылбыт дириҥ билиилэринэн, дьоҥҥо-сэргэҕэ амарах сыһыаннарынан уонна сатабылларынан, бар дьон махталын ылар үрүҥ аанньал буола үүнэн тахсалларыгар баҕа санааларын тиэртилэр. Улуус дьаһалтатын пресс-сулууспата.