«Ӧлімі чох полк» чӧрім онлайн иртер — 8 мая 2026 г. в 03:51:28.077
«Ӧлімі чох полк» чӧрім онлайн иртер 2026 чылның сілкер айының 9-ҷы кӱнінде орындағы тус хоостыра 12:00 частаң пасти «Ӧлімі чох полк» чӧрімнің трансляциязы иртер. Чӧрім прай хазнаҷа иртер паза Россияның аймах регионнарынаң ветераннарны пір онлайн-чӧрімде піріктірер. Ідӧк ол аймах-пасха медиа ачыхтарда паза телеканалларда кӧзіділер. Чӧрімні 2020 чылдаң сығара «Россияның Ӧлімі чох полкы» ООД «Сбербанк» ПАО-наң паза VK компаниянаң хада иртірче. 2026 чылда ағаа тимненіс 23 хосхардаң пасталған. Тиксі хазнадаң аймах ачыхтар полызиинаң Илбек Ада чаа араласчыларынаңар сурыныстар чыылған. Пайрамнығ трансляция сайбағ паза провокация чох иртер ӱчӱн, полған на чаа араласчызынаңар искіріг сыныхталған. Ол тоғысты 2800 модератор паза тархын істезігҷілері толдырған. Чиңіс кӱнінде ӧӧн трансляция сайтта иртер: 2026.polkrf.ru, медиаэкраннарда паза пасха даа орыннарда, тізең, видеорядтар Ыраххы Востоктаң кӧзіділіп пастир. Прай хазнаҷа чӧрім орындағы тусча 12:00 часта пасталар. Кӧзідіге чыл сай орындағы ТВ-каналлар хозылча паза туралардағы искірігліг медиаэкраннарда, мониторларда, авто-, тимір чол вокзалларында паза аэропорттарда трансляция апарылча. Пістің ӧме ідӧк 2026 чылның «Ӧлімі чох полк» чӧріміне хозылча паза Чиңіс кӱнінде 12:00 часта трансляцияны пастир. Аннаң пасха сірер піске алындағы чылларда Илбек Ада чаада араласхан туған-чағыннарыңнаңар искірігні ыспаан ползар, пӱӱл ызарға маңнанчазар. Піске кирек полар чаа араласчызының сомы, толдыра ады-солазы, чуртаан чыллары, чааға хығыртылған тузы паза орны, званиезі, чаа чолы паза сыйыхтары. Искірігні ӧменің адына пазып ызарға чарир! Ол искіріг «Ӧлімі чох полк» ӧменің (https://vk.ru/club194721279) искіріглер стенезінде, «Хакас чирі» республика газетазының сайтында (https://www.khakaschiry.ru/lim-chokh-polk/) паза аның социальнай сетьтердегі каналларында (ВКонтакте, МАКС) сығарылар.