Ноутбукты ябырға тотонған Зилиә йығылып китмәҫ өсөн ултырғысҡа сүгә: ире, баҡһаң, таныш...
Ноутбукты ябырға тотонған Зилиә йығылып китмәҫ өсөн ултырғысҡа сүгә: ире, баҡһаң, танышыу сайтында ултырған! "Өҫтөмә боҙло һыу ҡойҙолармы ни! Мин дә, балалар ҙа уның өсөн ҡәҙерһеҙ, кәрәкмәгән кешеләр инек, әйтерһең, тормошонда беҙ бөтөнләй юҡ, булмағанбыҙ ҙа – быны төшөнөп, әллә күпме шаңҡып ултырҙым, – тип тасуирлай ул саҡтағы хәлен Зилиә. – Иремдең аккаунтына логин һәм паролде нисек хәтеремдә ҡалдырғанымды үҙем дә белмәйем. Шул көндән башлап алған һәр хатын, ебәргән һәр хәбәрен уҡый башланым. Ашауҙан, йоҡонан яҙҙым" Ирен юғалта барыуын аңлауҙан йөрәге һыҙылған ҡатын бер кистә тәүәккәл аҙымға бара: танышыу сайтында теркәлеп, уның менән аралашыу юлдарын эҙләй башлай: «Фәрит тәү күргәндә ғашиҡ булып, мине Айым тип йөрөткәйне. Шуны иҫемә төшөрөп, сайтҡа үҙ фотомды түгел, Ай һүрәтен ҡуйҙым, исемемде лә Айым тип атаным.Кистәрен икебеҙ ике бүлмәлә ултырып, хат алыша башланыҡ. «Мине бер кем дә шулай һинең кеүек тәрән аңлағаны юҡ, торған һайын яҡыныраҡ, ҡәҙерлерәк һин минең өсөн» – был һүҙҙәрҙән ҡапма-ҡаршы тойғолар кисерәм: йылы бәхет тулҡынында бәүеләм дә ергә, һалҡын ысынбарлыҡҡа ҡайтам. Ә ысынбарлыҡтың һалҡынлығынан һәр күҙәнәгем өшөй. Фәрит сайтта ошоғаса аралашҡан ҡатындарға ҡыҙыҡһыныуын бөтөнләй юғалтып, бар иғтибарын Айымға йүнәлтте. Егерме биш йыл бергә йәшәгән иремде минән дә яҡшыраҡ өйрәнгән кеше юҡ: уны белеү йәһәтенән берәү ҙә минең менән ярыша алмай шул. "Ҡыҙыҡ ҡына тойғо миндә: һинең менән йөҙ йыл таныш кеүекмен" – был һүҙҙәрҙән, "фаш ителеп ҡуймайым" тип, тертләп китәм"... Әйҙә, осрашыуҙы артабан һуҙмайыҡ? Ошо ялда күрешәйек. Ғүмер буйы эҙләгән кешем һин..." – ҡайнар тәҡдимгә яуап итеп Зилиә: "Ә ҡатының?"– тигән бик ҡыҫҡа һорау ебәрә. «Ныҡлы ҡарарға килдем: айырылышам!»