Халыҡ-ара балаларҙы яҡлау көнө алдынан «Салауат» йәмғиәте коллективы, директор Таһир Бә... — 1 июня 2026 г. в 12:33:17.084
Халыҡ-ара балаларҙы яҡлау көнө алдынан «Салауат» йәмғиәте коллективы, директор Таһир Бәхтигәрәев етәкселегендә Дәүләт ауылында йәшәүсе Нурзилә Исламғолованың хәлен белергә барҙы. Хәтерегеҙгә төшөрәбеҙ, 2024 йылда ҡыҙ бала янғын фажиғәһендә ауыр йәрәхәт ала. Ул үҙенең бәләкәй һеңлеләрен ҡотҡарғанда тәне бешә. Күп операция үткәргәндән һуң барлыҡҡа килгән ҡатмарлыҡ арҡаһында Нурзилә йөрөү һәләтен юғалта һәм оҙайлы, етди реабилитацияға мохтаж була. РМК-ның Хәйриә фонды һәм «Салауат» йәмғиәте ярҙамы менән Нурзилә Екатеринбург ҡалаһындағы Волкова клиникаһында дауалана һәм тергеҙеү курсы үтә. Табиптарҙың юғары һөнәрилеге, иғтибары һәм хәстәрлеге ысын мәғәнәһендә мөғжизә тыуҙыра — ҡыҙ яңынан үҙаллы йөрөй башлай. Бөгөн Нурзилә ғаиләһенең һөйөүе һәм хәстәрлеге менән уратып алынған тыуған йортонда йәшәй. Ата-әсәһе Гөлсибәр һәм Юлдаш Исламғоловтар дүрт бала тәрбиәләй. Осрашыу барышында Нурзилә үҙенең уҡыуҙағы уңыштары һәм ҡаҙаныштары тураһында һөйләне. «Мин дүртенсе класты тик “бишле” билдәләренә генә тамамланым!» — тип шатлығы менән уртаҡлашты ул. Әңгәмә ваҡытында Таһир Тимербай улы ҡыҙҙың һаулығын тергеҙеү барышы менән ҡыҙыҡһынды, әсәһе Гөлсибәр Исламғолова менән киләсәктә кәрәк булыуы мөмкин булған ярҙам мәсьәләләрен дә ҡараны. «Июнь айында ҡабаттан тикшерелергә йыйынабыҙ. Табиптар Нурзиләнең һаулыҡ торошон баһалап, уны артабан реабилитациялау буйынса тәҡдимдәр бирәсәк», — тине әсәһе. Осрашыу аҙағында компания вәкилдәре Исламғоловтар ғаиләһендәге бөтә балаға ла бүләктәр тапшырҙы һәм уларға ныҡлы һаулыҡ, бәхетле бала саҡ һәм яҡты киләсәк теләне. Беҙҙе МАХ, ВКһәм ОК- ла уҡып була