Бүгүн, ол эбэтэр, атырдьах ыйын 21 күнүгэр, “Биир Ньыгыл Арассыыйа” Сунтаардааҕы салаат...
Бүгүн, ол эбэтэр, атырдьах ыйын 21 күнүгэр, “Биир Ньыгыл Арассыыйа” Сунтаардааҕы салаатын быыбар иннинээҕи штабыгар СӨ Ил Дарханын сүбэһитэ Игорь Николаев, СӨ доруобуйа харыстабылын миниистирин бастакы солбуйааччы Дмитрий Сергин уонна “СӨ Судаарыстыбаннай сакаасчытын сулууспата” тэрилтэ генеральнай дириэктэрин бастакы солбуйааччы Андрей Павлов Сунтаар нэһилиэгин активын, штаб быыбар тэрээһинигэр көҕүлүүр дьонун кытта көрүстүлэр. Сунтаар улууһун баһылыгын солбуйааччы, "Биир Ньыгыл Арассыыйа" олохтоох штабын салайааччыта Павел Григорьев, Сунтаар нэһилиэгин баһылыга Эдуард Филиппов мунньаҕы буолаары турар Госдуума депутаттарын талар быыбары сырдатыыттан саҕалаатылар. Салгыы кэлбит ыалдьыттар бу буолаары турар быыбар урукку кэмнээҕи быыбардартан уратыта – дойдуга уустук кэмҥэ ыытылларын тоһоҕолоон туран, тоҕо чопчу «Биир Ньыгыл Арассыыйаны» өйүүр сөптөөҕүн баартыйа үлэлээн кэлбит сылларыгар туох ситиһиллибитигэр тирэҕирэн лоп бааччы быһааран кэпсээтилэр. Игорь Игнатьевич хас биирдии быыбардааччы: «Хайдах куоластаатахпына дойдубар, норуоппар ордук туһалаах буолуой?» диэн ыйытыыга боччумнаахтык толкуйдаан баран куоластыырга кыһаныахтаах диэн олус сөптөөх бэлиэтээһини оҥордо. Дмитрий Дмитриевич Сунтаар улууһугар бу кэлиитигэр Тойбохойго тутулла турар быраас амбулаториятыгар сылдьыбытын, бүгүҥҥү туругунан тутуу болдьохтоох кэмигэр үлэҕэ киирэригэр эрэнэрин эттэ. Кэнники сылларга баартыйа көҕүлүүр бырагырааматынан, федеральнай нацбырайыактарынан хаһан да буолбатах сөҕүмэр элбэх тутуу ыытыллыбытын бэлиэтээн туран, аҥаардас доруобуйа харыстабылын салаатыгар киин эрэ сиргэ буолбакка, чиэски сытар нэһилиэктэргэ, хоту оройуоннарга эмиэ аныгы үйэҕэ толору эппиэттиир медицина дьиэлэрэ тутуллубуттарын холобурдаата. МРТ, КТ курдук сыаналаах медоборудованиеларынан куораттар эрэ балыыһалара буолбакка, элбэх нэһилиэнньэлээх улуус балыыһалара хааччыллыбыттара чахчы улахан ситиһии буоларын бэлиэтээтэ. “СӨ Судаарыстыбаннай сакаасчытын сулууспата” тэрилтэ генеральнай дириэктэрин бастакы солбуйааччы Андрей Михайлович киин биэдэмистибэлэргэ тутууну туруорсуу олус уустугун, ол эрээри Саха сиригэр ити чааһыгар элбэх үбүлээһин көрүллэрин, онно Госдумаҕа баар депутаттарбыт оруоллара улаханын тоһоҕолоон эттэ. Көрсүһүү түмүгэр кэлбит дьон олус сэргэх кэпсэтии буолбутугар махтаннылар. Атын регионнарга сылдьан киһи олох таһымын тэҥнии көрөр үгэстээҕин, бэйэбит дойдубут лаппа сайдыылааҕыттан киэн туттарын элбэх киһи астына бэлиэтээтэ.