*БОРДОҤ САЙЫЛЫГАР ҮРДҮК КӨРДӨРҮҮ: Улуус баһылыга Анатолий Григорьев Арассыыйа Үлэтин Дь... — 20 августа 2026 г. в 13:05:39.488
*БОРДОҤ САЙЫЛЫГАР ҮРДҮК КӨРДӨРҮҮ: Улуус баһылыга Анатолий Григорьев Арассыыйа Үлэтин Дьоруойа Владимир Михайловы кытта көрүстэ* 🌿🌿🌿 Сунтаар улууһун баһылыга Анатолий Григорьев Бордоҥ сайылыгар анаан сырытта уонна тыа хаһаайыстыбатын үлэһиттэрин кытта көрүстэ. Манна кини Арассыыйа Үлэтин Дьоруойа, "Албан аат" уордьанын толору кавалера, баай уопуттаах ыанньыксыт Владимир Михайловтыын ирэ-хоро кэпсэттэ. Баһылык сырыытын сүрүн сыалынан сайылык үлэтин хаамыытын, ыам туругун уонна тыа сирин үлэһиттэрин усулуобуйатын кытта билсиһии буолар. Бүгүн Бордоҥ сайылыгар үлэ күөстүү оргуйар. Сүөһү көрүүтүгэр уонна үүт аһын элбэтиигэ хас биирдии үлэһит бэйэтин кылаатын киллэрэр. Сайылыкка билигин 160 ыанньык баар. Күн аайы ортотунан 3 туонна 900 киилэ үүтү туталлар. Владимир Африканович Михайлов Сунтаар сириттэн тахсыбыт ураты киһи. Кини олоҕун 50-н тахса сылын тыа хаһаайыстыбатыгар, ол иһигэр ыарахан уонна бочуоттаах ыанньыксыт үлэтигэр анаабыта. Көрүсүһүү кэмигэр уопуттаах маастар сайыҥҥы ыам туругун сиһилии кэпсээтэ. Ону таһынан, быйыл от олус үчүгэйдик үүммүт, ол аата кыстыкка ас-үөл хааччыллыыта үчүгэй. Маны тэҥэ, сир аһа эмиэ дэлэйдик үүнэн быйаҥнаах сайын буолла диир. Улуус баһылыга Анатолий Григорьев сайылык үлэһиттэригэр уонна Владимир Михайловка бэйэтин дириҥ махталын биллэрдэ. Кини тыа хаһаайыстыбатын туруу үлэһиттэригэр чэгиэн туругу, айымньылаах үлэни уонна сайылык үрдүк көрдөрүүлэрэ өссө да үрдүү туралларыгар баҕарда. _Сунтаар улууһун дьаһалтатын пресс-сулууспата_