Ытыктабыллаах Сунтаар улууһун Ийэлэрэ уонна Аҕалара!
Ытыктабыллаах Сунтаар улууһун Ийэлэрэ уонна Аҕалара! "Сунтаар улууһа (оройуона)" муниципальнай оройуон дьаһалтатын, улуус депутаттарын Сэбиэтин уонна тус бэйэбит ааппытыттан Эһигини, дьиэ кэргэн дурдата-хаххата, бигэ тирэҕэ, олоҕун тутула эр дьоммутун, алаһа дьиэ араҥаччылара, үрүҥ дьиэ үрүмэччилэрэ далбар хотуттары Арассыыйаҕа Аҕа, Саха Өрөспүүбүлүкэтигэр Ийэ күннэринэн итиитик-истиҥник эҕэрдэлиибит! Саха киһитэ былыр былыргыттан аҕаны дьиэ кэргэн тутула, үлэ-хамнас сүрүн тэрийээччитэ диэн үрдүктүк тутара. Аҕа бэйэтин холобурунан үтүө суобастаахтык олорорго, үлэни таптыырга, наадалаах кэмҥэ аттыгар буоларга, төрөөбүт дойдуну таптыырга үөрэтэрэ. Бүгүн улууспут олоҕун бары хайысхаларыгар аҕалар инники күөҥҥэ сылдьалларыгар, улууспут экономиката сайдарыгар, дьон олоҕо тупсарыгар сыраларын-сылбаларын, билиилэрин, сатабылларын биэрэн туран үлэлииллэригэр махтанабыт! Билиҥҥи уустук кэмҥэ эр санаалаах, хорсун-хоодуот буойун аҕаларбыт Анал байыаннай дьайыыга Ийэ дойдуларын иннигэр бэриниилээхтик сулууспалыыллар, уот-буулдьа аннынан дьоруойдуу быһыыны көрдөрөллөр. Эһиги эйэлээх олох иһин туруулаһар күүстээх санааҕытыгар сүгүрүйэбит уонна эһигинэн киэн туттабыт! Ийэ – олох саҕаланыыта, таптал түмүгэ, дьол биһигэ. Эһиги дьиэ кэргэҥҥэ күннэтэ кэнчээри ыччаккытын иитэр, үөрэтэр аналгыт, оҕоҕутугар анаабыт тапталгыт, сылаас сыһыаҥҥыт оҕоҕо олох биэрэринэн эрэ бүппэккэ, кинини киһи-хара оҥорор, кэскилин түстүүр. Ийэ сүрэҕэ – хаһан да сүппэт, хаһан да уҕараабат таптал дьиҥнээх символа. Аныгы ийэ дьыалабыай хаачыстыбатынан уонна талаанынан, сатабылынан уонна дьоҕурунан биһирэнэр идэлээх үлэһит, нэһилиэк, улуус уопсастыбаннай, бэлитиичэскэй олоҕор көхтөөхтүк кыттар актыыбынай позициялаах кэрэхсэнэр киһи буолан, Эһиги үлэҕититтэн, ис кыаххытыттан, ийэлии кыһамньылаах сыһыаҥҥытыттан улууспут, дойдубут инникитэ быһаччы тутулуктааҕын билинэбит уонна сыаналыыбыт. Ытыктабыллаах Ийэлэр уонна Аҕалар! Бу үөрүүлээх күҥҥэ хас биирдиигитигэр тулуургут, күүскүт, дьиэ кэргэҥҥитигэр тапталгыт, бэриниигит иһин махтал тылларын тиэрдэбит. Эһиэхэ чэгиэн доруобуйаны, дьолу-соргуну, ситиһиилээх үлэни баҕарабыт. Дьиэҕит сылааһынан эрэ илгийдин, таптал, өйдөһүү, үөрүү-көтүү эрэ аргыстастын, ил-эйэ эҥэрдэстин! Сунтаар улууһун баһылыга А.В. Григорьев Улуустааҕы депутаттар Сэбиэттэрин бэрэссэдээтэлэ У.Д. Попова