Алтынньы 5 күнүгэр Учуутал күнүгэр аналлаах таптыыр идэлэрин сырдык сулус оҥостон кэнчэ...
Алтынньы 5 күнүгэр Учуутал күнүгэр аналлаах таптыыр идэлэрин сырдык сулус оҥостон кэнчээри ыччаппытын үөрэх-сайдыы суолугар угуйар айымньылаах үлэ үгэнигэр сылдьар Дьокуускай куорат саха тылын уонна литературатын учууталларыгар аналлаах «Учуутал доҕотторбут» тэрээһин үрдүк таһымнаахтык ааста. П.А. Ойуунускай аатынан литература түмэлин дириэктэрэ Рустам Николаевич Каженкин бүгүҥҥү идэлээх бырааһынньыктарынан учууталлары чуораан чугдаарар тыаһынан саҕалаата уонна эҕэрдэлээтэ. Дьокуускай куорат орто оскуолатын саха тылын уонна литературатын учууталларын методическай холбоhугун учууталлара бары даҕаны бу ирдэбилгэ эппиэттиир, бэйэлэрэ айар, ыллыыр-туойар, саҥарар-иҥэрэр талааннаах дьон. Саха политехническай лиссиэй саха тылын, литературатын учуутала, куорат саха тылын, литературатын учууталларын методическай холбоһугун салайааччыта Заболоцкая Ульяна Васильевна, Национальнай гимназия саха тылын, литературатын учуутала Анисимова Галина Семеновна, 26 №-дээх орто оскуола саха тылын, литературатын учуутала, “Алгыстаах сахам тыла” куорат саха тылын, литературатын учууталларын түмсүүтүн салайааччыта Борисова Марианна Николаевна, Саха гимназиятын саха тылын, литературатын учуутала Антонова Анжелика Алексеевна, 1 №-дээх орто оскуола саха тылын, литературатын учуутала Попова Анна Даниловна, 2 №-дээх национальнай политехническай орто оскуола саха тылын, литературатын учуутала Ильина Антонина Антоновна, «Айыы кыһата” национальнай гимназиятын саха тылын, литературатын учуутала Матвеева Александра Лукинична-Долгура кыттыыны ыллылар. Учууталларга сүбэһитинэн М.К. Аммосов аатынан хотгулуу-илиҥҥи федеральнай үнүбүрсүтүөт Хотугулуу-илиҥҥи норуоттар тылларын уонна култуураларын үнүстүүтүн саха литэрэтиирэтин орто оскуолаҕа үөрэтиигэ мэтэдиис учуонайа, педагогика билимин дуоктара, бэрэпиэссэр Поликарпова Евдокия Михайловна уонна бэдэгиэгикэ билимин хандьыдаата, М.К. Аммосов аатынан Хотугулуу-Илиҥҥи бэдэрээлинэй үнүбэрситиэт Арассыыйа хотугулуу-илиҥҥи норуоттарын тылларын уонна култуураларын үнүстүүтүн дассыана Марина Трофимовна буоллулар. Музей быыстапкалыыр салаа испэсэлииһэ Халгаева Ньургуйаана Викторовна «Учуутал суруйааччы» бырайыак ис хоһоонун, туох үлэ ыытыллыбытын уонна кылгастык суруйааччы учууталлар үөрэппит оҕолоро кэлин суруйааччы учуутал буолбуттарын туһунан истиҥник сэһэргээтэ. Салгыы учууталларга анаан музейбыт фондатыттан суруйааччы экспонатын кэпсэтиннэрдибит. Учууталлар биир-биир тахсан үөрэнээччилэригэр сэһэргиир курдук экспонат туһунан олус кэрэхсэбиллээхтик, дириҥник ырытан кэпсээтилэр. Ол курдук, Өксөкүлээх Өлөксөй чэрэниилэ приборун, Николай Неустроев кириэһилэтин, Семен Данилов бартыбыалын, Далан Венера Милосская статуэткатын, Платон Ламутскай эбээннии тылынан кинигэлэрин уонна Василий Босиков бэйэтэ чочуйбут чороонун көрөөччүлэргэ көрдөрөн тутан-хабан сэһэргээтилэр. Ырыа да ыллаатылар, хоһоон да аахтылар. Мустубут дьон экраҥҥа «Суруйааччы учууталлар» диэн слайданы олус сэргээн көрдүлэр. Саха норуотун суруйааччыта Дмитрий Федосеевич Наумов кэргэнин суруйааччы учуутал аймахтарын, аҕатын туһунан кэпсээн дьон сэҥээриитин ылла. Ол курдук, учуутал, бэйиэт, суруналыыс, политрук Иванов Василий Ксенофонтович-Кустуктуурап бииргэ төрөөбүт балтын уолун, кэлин саха норуотун бэйиэтэ буолбут Петр Николаевич Тобуруокабы, оскуолаҕа үөрэппитин, кэлин Петр Тобуруокап оскуолаҕа үөрэппит оҕолорун туһунан истиҥник сэһэргиирин уонна үөрэнээччилэрэ киниэхэ махтал-баһыыба тылларын эппиттэриттэн үөрэрин туһунан киһи долгуйуох курдук кэпсээтэ. Кустуктуурап төрөппүт уола Василий Федотович Гольдеров-Ороһу уола оскуолаҕа учууталынан үлэлээбитэ. Кэлин саха норуотун суруйааччылара буолбут Дмитрий Наумовы, Василий Васильевы-Харысхалы уонна биллиилээх бэйиэти Семен Капитоновы үөрэппитэ. «Баара буоллар үөрэнээччилэринэн киэн туттуохтааҕа хааллаҕа», диэн Дмитрий Федосеевич долгуйан туран эттэ.