Марий Эл Кугыжаныш Погынын депутатше да педагог-влак Йошкар-Оласе школлаште национальны... — 28 августа 2026 г. в 09:44:03.740
Марий Эл Кугыжаныш Погынын депутатше да педагог-влак Йошкар-Оласе школлаште национальный компонентым школыш шыҥдарыме шотышто совещанийым эртареныт. Пашаче вашлиймаш рӱдоласе 32-шо номеран школышто эртен. Тушко депутат-влак Марий Эл Кугыжаныш Погын председательын икымше алмаштышыже Лариса Яковлева, тыгак Эдуард Александров, Наталья Пушкина, Григорий Пейсахович, тыгак оласе администраций да туныктыш виктемын еҥышт ушненыт. Совещанийыш толшо-влак пошкудо регионышто чуваш йылмым вияҥдыме опыт нерген ойленыт. Тений апрельыште Марий Эл Кугыжаныш Погынын да Чувашийсе Кугыжаныш Советын профильный комитет-влакын выездной заседанийышт лийын. Чувашийыште чуваш йылмым тунеммаште школ тоштерым, кабинет-влакым почмашым палемдат. Тушто урок, экскурсий, мастарлык класс да вашлиймаш-влак эртаралтыт. Мемнан кундемыште Йошкар-Оласе 14-ше номеран гимназийыште марий да татар йылмым туныктымо практикым ойленыт. Тыге, иктешлымаш семын Йошкар-Оласе 32-шо номеран школышто пилотный проект семын урок дечын вара йылмым тунемме да вияҥдыме практикым шындыме проектлан 15 сентябрь марте «дорожный картым» ыштат. Тиде опыт лектышан лиеш гын, тудым вес школлаштат кучылташ тӱҥалыт.