Таче Йошкар-Олаште «И краткая» кинофестивальым почыт. — 27 августа 2026 г. в 09:23:22.148
Таче Йошкар-Олаште «И краткая» кинофестивальым почыт. Тений тудо III гана эртаралтеш. Фестивальыш Российын тӱрлӧ регионжо гыч 500 утла йодмаш пурен. Конкурс программыште 32 паша, нуным икмыняр категорий дене аклат: игровой, документальный, анимационный, моткоч чот кӱчык фильм. Почетан уна семын фестивальыш Россий сымыктышын сулло деятельже Андрей Эшпай, тыгак кинорежиссер, продюсер, Марий кундемын шочшыжо Алексей Нужный, российысе кино да рекламе режиссер Александр Володин толыт. Алексей Нужный Йошкар-Олаш «Как Иван в сказку попал» фильмын премьерыжым конда, тудым фестивальым мучашлыме годым ончыктат. Кумда прокатыш тиде фильм октябрьыште лектеш. «И краткая» фестиваль Тӱвыра инициативылан полышышо президент фондын, регионысо кинематографлан полышышо фондын да республикысе тӱвыра министерствын полышымыжо дене эртаралтеш.