Йошкар-Олаште «Юнармий пӧртым» почыныт.
Йошкар-Олаште «Юнармий пӧртым» почыныт. Тачысе кечын мемнан кундемыште 205 отрядыште 7000 утла йоча шуаралтеш. 2018 ий гыч «Юнармийын» регионысо штабшылан Йошкар-Олан шочшыжо, Россий Герой Марк Евтюхинын лӱмжым пуымо. 2023 ий гыч активист-влаклан «Юнармейская доблесть» медальым кучыктат. 2025 ийыште «Авангард» рӱдер «Регион для молодых» программе дене субсидийлан конкурсым эртен. Тудын дене рӱдерын кокымшо корпусшым ыштеныт, зданийым тӧрленыт. Тудо Йошкар-Олаште верланен. Тушто «Юнармий пӧртым» почыныт. Тӧнежыште самырык-влаклан тунемаш кабинет-влак улыт. Тушто нуно картографий, топографий, пилотдымо авиаций системе да моло виктыш денат шинчымашыштым келгемдаш тӱҥалыт. Тидын дене пырля ты пӧртыштӧ тӱшка мероприятий годым 50 наре еҥ илен кертеш. Каласыман, таче тыгак Самырык-влакын полатыштышт Юнармий толкынын 10-шо слётшо эртен.