🎭 Йошкар-Олаште Андрей Эшпай лӱмеш опер сымыктыш фестиваль лиеш!
🎭 Йошкар-Олаште Андрей Эшпай лӱмеш опер сымыктыш фестиваль лиеш! Марий Эл кугу тӱвыра событийлан ямдылалтеш: 1 гыч 10 октябрь марте Эрик Сапаев лӱмеш Марий кугыжаныш академический опер да балет театрыште Андрей Эшпай лӱмеш VI опер сымыктыш фестиваль эртаралтеш. Марий сценыште Российын тӱҥ театрла гыч ӱжмӧ уна-влак шке мастарлыкыштым ончыктат. Нуно чапланыше классикым темлат: Джузеппе Вердин «Аида», тыгак Пётр Чайковскийын «Евгений Онегин» да «Иоланта» паша-влакым ужын кертыда. Тыгак «Алдиар» оперын премьерыже лиеш. Тудым композитор Эллина Архипова возен. Режиссёр - Михаил Панджавидзе. Ты постановко дене фестивальым почыт да петыраш тӱҥалыт. «Алдиар» сюжет мемнам XVI курымыш, Иван Грозныйын саманже да марий кундемын Россий кугыжанышыш ушнымо неле пагытышкыже наҥгая. Каласкалымаш рӱдыштӧ — сонарзе Алдиарын чоныш витыше йӧратымаш историйже. Эллина Архипован музык йылмыже тиде постановкышто шкешотан: композитор партитурыш илыш гыч налме кутырымо интонацийым да калык преданийым мастарын шыҥдарен. Фестивальын продюсерже — Российын сулло артистше Айдар Шайдуллин («Глобэкс промоушен» ООО). Фестивальын спонсоржо — ВТБ банк.