Марий Эл гыч проект-влакым федерал кӱкшытыштӧ палемденыт.
Марий Эл гыч проект-влакым федерал кӱкшытыштӧ палемденыт. Кумдык-влакым комплексно вияҥдыме шотышто Российысе конкурсышто мемнан кундем гыч 6 йодмаш лийын, нунын гыч нылытше награде да диплом дене палемдалтын. Регион вуйлатыше Юрий Зайцев шке социал кыл каналлаштыже возен, тиде республикын, муниципалитет-влакын да чоҥышо-влакын пырля, ик ой дене ыштыме пашашт. Мемнан кундемыште тоштемше, аварийныйлан шотлалтше пӧртла гыч еҥ-влакым кусарыме паша сайын шукталтеш, тидын годым йӧнан средам ыштымаште - регион кӱкшытыштӧ. Тиде «Инфраструктура для жизни» нацпроект дене келшышын шукталтеш. Финалыште Панфилов уремыште кумдыкым комплексно тӱзатыме проектлан 2 вер дене, тыгак Чавайн, Киров, Сергей Жилин уремлаште кумдык-влакым тӱзатымаш шотышто проект-влак 3 вер дене палемдалтыныт.