«Мичээр мэниктэрэ» КВН оонньуу үрдүк таһымнаахтык ыытылынна — 7 мая 2026 г. в 10:28:11.888
«Мичээр мэниктэрэ» КВН оонньуу үрдүк таһымнаахтык ыытылынна Ыам ыйын 7 күнүгэр Сунтар нэһилиэгин «Кыталык» оҕо сайдар киинигэр 5–7 саастаах оҕолорго аналлаах «Мичээр мэниктэрэ» диэн көрдөөх уонна интеллектуальнай КВН оонньуу ситиһиилээхтик түмүктэннэ. Бу оонньууну тэрийэн ыытта иитээччи Акимова Татьяна Анатолиевна. Тэрээһиҥҥэ барыта 18 оҕо кытынна. Кинилэр икки хамаандаҕа арахсан күөн көрүстүлэр. Кыттааччылар хамаандаларын аатын, девиһин уонна эмблематын бэйэлэрэ толкуйдаан, сахалыы таҥнан, реквизиттэрин бэлэмнээн кэлбиттэрэ. Оонньуу түөрт сүрүн түһүмэхтэн турда: 🔹 «Билсиһии» – хамаандалар бэйэлэрин билиһиннэрдилэр, кылгас көрдөөх нүөмэрдэри көрдөрдүлэр; 🔹 «Дьиэтээҕи сорудах» – төрөөбүт саха тылынан хоһоон, олоҥхо ааҕан иһитиннэрдилэр. 🔹 «Хапытааннар күрэхтэрэ» – түргэн толкуй, логическай ыйытыктар уонна хоруйдар; 🔹 «Импровизация» – жюри биэрбит тиэмэтигэр эбэтэр ситуацияҕа түргэнник хоруй биэрии. Оҕолор айар дьоҕурдарын, бэйэ-бэйэлэрин кытта үлэлиир кыахтарын уонна саха тылын баайын арыйдылар. Хамаандалар биир сомоҕо буолан, доҕордоһууну, кыайыыны бииргэ ылынар үөрүйэҕи көрдөрдүлэр. Жюри чилиэннэрэ (3–5 киһи) 10 бааллаах систиэмэнэн хамаандалары маннык критерийдэринэн сыаналаатылар: тиэмэни арыйыы, саха тылынан толору саҥарыы, хамаанда сомоҕото. 🏆 Түмүккэ: Бары кыттааччы хамаандалар «Кыттааччы туоһу суругунан» уонна грамотанан бэлиэтэннилэр. Бу оонньуу оҕолорго төрөөбүт тылы уонна култуураны харыстыылларыгар, доҕордоһуу өйдөбүлүн иҥэриигэ улахан сабыдыаллаах буолла. «Кыталык» оҕо сайдар киинэ маннык көхтөөх тэрээһиннэри инникитин да салҕыыр былааннаах. Кыттааччы оҕолорбутугар өссө да ситиһиилэри, доруобуйаны уонна элбэх мичээри баҕарабыт!