МБДОУ "Тюнгюлюнский центр развития ребенка-детский сад "Олимпионик" МР "Мегино-Кангаласский улус (район)"
Лайфстайл · 8 мая 2026 г.
Үйэлэргэ уруйдан, оҕо сааспыт биһигэ! ... — 8 мая 2026 г. в 08:06:05.112
Үйэлэргэ уруйдан, оҕо сааспыт биһигэ! Мэҥэ-Хаҥалас улууһугар оскуола иннинээҕи үөрэхтээһин тэриллибитэ 100 сылын бэлиэтиир “Уһуйааҥҥа анаммыт 100 үтүө дьыала” улуустааҕы челленджка Төҥүлүтээҕи “Олимпионик” оҕо сайдар киинэ актыыбынайдык кыттыста. Ыам ыйын 7 күнүгэр “Эйгэ” култуура киинигэр “Үйэлэргэ уруйдан оҕо сааспыт биһигэ” диэн аахсыйа-кэнсиэр үрдүк таһымҥа буолан ааста. Тэрээһин хас да туһунан хайысханан ыытыллан, кэлбит ыалдьыттарга умнуллубат түгэннэри бэлэхтээтэ: 1. “Минньигэс аас” атыы-эргиэн дьаарбаҥката Уһуйаан үлэһиттэрэ бэйэлэрэ астаабыт ас-үөл арааһын: “Олимпионик” фирменнэй бутербродун, итии бэрэскини, морс, фруктовай микс уонна вафли курдук минньигэс астары дьон олус хамаҕытык атыыласта. 2. “Кустук өҥнөөх тапталлаах детсадым” быыстапка Оҕолор уруһуйдарын быыстапката уонна атыыта буолла. Дьон оҕолор уруһуйдарын сэргээн, астына көрдүлэр уонна үөрэ-көтө атыылаһан ылан, уһуйаан сайдарыгар бэйэ кылаатын оҥордулар. 3. “Үйэлэргэ уруйдан оҕо сааспыт биһигэ” кэнсиэр Кэнсиэр сүрүн идеятынан — оҕо, төрөппүт уонна иитээччи бииргэ алтыһыыта буолла. Барыта 181 киһи сомоҕолоһон, чаҕылхай эҕэрдэ нөҥүө бэйэлэрин талааннарын арыйдылар. Саамай кырачааннартан саҕалаан, быйыл оскуолаҕа детсадтарын бүтэрэн барар оҕолоругар тиийэ — бары сыл устата тугу үөрэммиттэрин, сатаабыттарын уонна сайдыбыттарын итэҕэтиилээхтик көрдөрдүлэр. Көрөөччүлэр өрө көтөҕүллэн туран биэрбит дохсун ытыс тыастара оҕолорго үрдүк үөрүүнү бэлэхтээтэ. Ыытааччылар: “Үрдэл” бөлөх иитиллээччитэ Дамир Баишев аҕатынан Михаил Ильичтыын уонна “Эрэл” бөлөхтөн Дамир Власов ийэтинээн Альбина Егоровналыын тэрээһини ситимин быспакка иилээн-саҕалаан ыыттылар. Дьиэ кэргэн талаана: Кэнсиэргэ Григорьевтар, Цыпандиннар, Софронеевтар ырыаларынан, Лариса Прокопьевна Говорова сиэттэрин кытта фольклорнай нүөмэринэн, Баишевтар хоһооннорунан дьон сүргэтин көтөхтүлэр. Кэрэ көстүү: Кузьминнар, Охлопковтар, Сухомясовтар, Барашковтар, Портнягиннар, Заровняевтар, Сорокиннар, Атласовтар, Толстяковтар дьиэ кэргэттэрэ сахалыы таҥас дефилетигэр кыттан кэрэхсэттилэр. Үҥкүү-битии: “Туйгун” бөлөх уолаттара аҕаларын, убайдарын кытта “Булчуттар үҥкүүлэрин” толорон сэргэхситтүлэр. Эдэр ийэлэр “Кылыыҥкай” ансаамбылын кыргыттара оҕолорун кытта “Ийэҕэ махтал” үҥкүүнэн көрөөччүлэр биһирэбиллэрин ыллылар. 4. Үтүө бэлэхтэр Уһуйаан ветераннара (“Чэчир”, “Олимпионик”) оҕолорго анаан сахалыы музыкальнай инструменнары бэлэх ууннулар, бэлэмнэнии бөлөх төрөппүттэрэ үҥкүүгэ аналлаах сахалыы платьелары тигэн, ону таһынан Төҥүлүтээҕи оҕо искусствотын оскуолата (дир. Варламова Г.И.) харчы биэрэн уһуйааҥҥа улахан көмөнү оҥордулар. Бу курдук сомоҕолоһуулаах, истиҥ эйгэлээх тэрээһин Төҥүлү нэһилиэгин олоҕун өссө биир чаҕылхай түгэнинэн буолла.