Саха Өрөспүүбүлүкэтин күнүгэр В.В. Алексеев аатынан Мүрүтээҕи уолаттар гимназияларыгар ... — 27 апреля 2026 г. в 07:29:41.439
Саха Өрөспүүбүлүкэтин күнүгэр В.В. Алексеев аатынан Мүрүтээҕи уолаттар гимназияларыгар үөрүүлээх линейка буолла. Муус устар 27 күнэ - тапталлаах Сахабыт сирэ автономиялаах өрөспүүбүлүкэ буолбут өрөгөйдөөх күнэ. Бу күн уоланнарга төрөөбүт дойдубут историятын билиһиннэрэр, Саха бэйэтин салайыныытыгар олук уурбут тумус туттар биир дойдулаахтарбыт: Степной Думаны тэрийбит, салайбыт И.Е. Мигалкин, саха революция иннинээҕи интеллигенциятын баһылыга В.В. Никифоров-Күлүмнүүр уонна автономияны туруулаһан ситиспит саха чулуу уолаттара Былатыан Ойуунускай, Максим Аммосов, Исидор Барахов дьоһун олохторунан киэн туттуу уонна дойдуга бэриниилээх буолуу тыыныгар иитэр сыаллаах үөрүүлээх линейка уонна кылаас чаастара ыытылыннылар. Гимназистары бу бэлиэ күнүнэн дириэктэр Валерий Валериевич Рожин эҕэрдэлээтэ, история учуутала Владислав Викторович Скороходкин Саха сиригэр государственность олоххо киирэригэр олук уурбут уонна турууласпыт улуу дьоммут ааттарын ааттаан, кинилэр үйэлэртэн үйэлэргэ умнуллубат үтүөлэрин тоһоҕолоон кэпсээтэ. Бу үөрүүлээх түгэҥҥэ “Уолан” ааҕар бөлөх кыттааччылара, 8 кылаас гимназистара, “Үүнэр-сайдар Сахам сирэ” уус-уран дьүһүйүүнү доргуччу аахтылар. Бүгүҥҥү тэрээһиннэргэ уоланнар “Мин – сахабын, сахам норуотун сорҕотобун” диэн санаанан салайтаран, көхтөөхтүк кытыннылар. Кинилэр Сахабыт Өрөспүүбүлүкэтин инники кэскилигэр тус кыттыылаахтарын уонна кэлэр кэмҥэ дойдуларын туһугар үлэлиир, төрөөбүт норуоттарыгар туһалаах дьон буолар сырдык аналларын өйдөөтүлэр.