♟«Тываның аныяктары» солуннуң баштайгы журнализиниң 100 харлаан юбилейинге тураскааткан... — 19 апреля 2026 г. в 10:33:18.964
♟«Тываның аныяктары» солуннуң баштайгы журнализиниң 100 харлаан юбилейинге тураскааткан шыдыраа маргылдаазы эрткен Кызыл хоорайның 2 дугаар школазын алдын медаль-биле бир дугааар дооскан, «Тываның аныяктары» солунга болгаш өске-даа солун-сеткүүлдерге журналист болуп ажылдап чораан Андрей Кончукович Чичаан-оолдуң 100 харлаан юбилейинге тураскааткан школачылар ортузунга шыдыраа маргылдаазы болуп эрткен. А.К. Чичаан-оол – Тыва АССР-ниң культуразының алдарлыг ажылдакчызы, очулдурукчу, журналист, «Асбест дээш» орус, тыва дылдыг солуннуң үндезилекчизи. Ол 1947 чылда Кызыл хоорайның 2 дугаар школазын алдын медаль-биле дооскаш, Москва хоорайга журналист мергежилди чедип алган. Бодунуң күш-ажылчы оруун «Тываның аныяктары» солунга эгелээн. Солуннуң кол редактору болуп ажылдап чораан. Ооң соонда, «Шын», «Блокнот агитатора» солуннарга ажылдаан. Сөөлгү чылдарда Ак-Довурак хоорайга «Туваасбест» комбинаттың дирекциязының база «Туваасбесстрой» эргелелдиң чанынга «Асбест дээш» солунну үндезилээн. ✅Зоя Андреевна Брутян, журналистиң уруу: 💬- Алдын медаль дээрге чүгле үнелел эвес. Ол – корум-чурумнуң, быжыг билигниң, стратегтиг угаан-бодалдың, бергелерге торулбас чоруктуң демдээ. Шак-ла бо шынарлар шыдыраага чугула херек. Мээң ачам Андрей Кончуковичиниң амыдырал-чуртталгазынга шыдыраа кол черни ээлеп чораан. Москвага ВЛКСМ-ниң Төп Комитединиң чанында Төп комсомолчу школаның шыдыраага чемпиону чораан. Шыдыраа ооң амыдырал-чуртталгазының кол угланыышкыны апарган. Ол оолдарын база шыдыраага өөреткен. Олар база үезинде шыырак ойнап чордулар. Ол бистерни «Шыдыраа дээрге базым бүрүзү чугула, школада амыдырал ышкаш кижини хевирлээринге дузалыг» деп чагып чораан. Школаның бирги алдын доозукчузунуң 100 харлаан юбилейинге тураскааткан шыдыраа маргылдаазын организастап тургаш, школа чүгле спортчу тиилелгелери-биле эвес, а угаан-бодалдың тиилелгези-биле чоргаарланып чоруурун демдеглекседим. Киржикчилергемаргылдаа «алдын медальдарже» чаа чада болган – өөредилгеге, чуртталгага база спортка! Маргылдаа үезинде өөреникчилерниң ада-иелери солун турнирни организастааны дээш З.А. Брутянга өөрүп четтиргенин илереткеннер. 💬«Уруглар болгаш ада-иелер маргылдаага өөрүшкү-биле киришкеннер. Светлана Алексеевна Сыргашева, даштыкы дылдар башкыларынга база «Сосновка школазының «Интеранционалчы найырал» клувунуң удуртукчузунга өөреникчилерин маргылдаага киириштирери-биле эккелгени дээш четтиргенимни илереттим. Оон аңгыда школаның шыдыраа клувунуң удуртукчузу Ада Ким-ооловнага турнирни организастаарынга улуг үлүг-хуузун киириштиргени дээш четтиргенимни илередип тур мен» - деп, Зоя Андреевна Брутян демдеглээн. ✅Андрей Чичаан-оол, Росгвардияның халажылгада подполковниги, журналистиң уйнуу: 💬- Мээң кырган-ачам Андрей Кончукович Чичаан-оолдуң 100 харлаан юбилейинге тураскааткан школачылар ортузунга шыдыраа маргылдаазын организастаанынга өөрүп тур мен. Мени кырган-ачамның ады-биле адаан чүве. Ынчангаш ол меңээ дыка чоок болгаш эргим. Шыдыраа маргылдаазынга өөреникчилер дыка идепкейлиг кириштилер. Школа назыны четпээн бичии чаштар безин бар: Чат Намзырай биле Аймина Донгак 6 харлыг болду. Тиилекчилерни шаңнап-мактаан. Оон аңгыда школаның шыдыраа клувунга кырган-ачамның төрел аймааның мурнундан 10 шыдыраа шактарын белекке берген. Шыдыраачы база журналист Андрей Кончукович Чичаан-оолдуң 100 харлаан юбилейинге тураскааткан школачылар ортузунга шыдыраа маргылдаазын ооң салгакчылары бедик деңнелге организастаанын сагындыраал.