🚦 Тывада школачылар «Айыыл чок чорук лабораториязы»-биле орук шимчээшкиннериниң дүрүмн... — 11 июня 2026 г. в 02:11:13.351
🚦 Тывада школачылар «Айыыл чок чорук лабораториязы»-биле орук шимчээшкиннериниң дүрүмнерин шиңгээдип турар Чайгы дыштанылга эгелээни-биле Тывада школачыларны орук шимчээшкининиң айыыл чок чоруунга өөредир чаңчылчаан профилактиктиг кампания эгелээн. «Айыыл чок чорук лабораториязы» көжүп чоруур комплекс уругларга үнүүшкүннүг кичээлдерни эрттирер. Уруглар үезин солун эрттирип, чугула билиглерни шиңгээдип алыр кылдыр, кызыл-сарыг өңнүг машина школа чанының база стационар лагерьлерге дээш, республиканың уруглар лагерьлеринге чедер. «Айыыл чок чорук лабораториязының» кол сорулгазы – айыыл чок чоруктуң дүрүмнерин сонуурганчыг болгаш чедингир кылдыр уругларга тайылбырлаары. Бо неделяда Кызылдың школа чанының: 22 дугаар школада «Пифагор» база 12 дугаар школада «Здоровейки» лагерьлерге кичээлдерни эрттирген. Уруглар орук шимчээшкининиң айыыл чок чоруунуң эге билиглерин улуг сонуургал-биле шиңгээдип алганнар. Орукка серемчилелдиг болурунга дузалаар кол дүрүмнерни интерактивчи хевирге катаптап, быжыглаан. Кичээлдерни оюннар болгаш практиктиг мергежилгелер таварыштыр эрттиргени, дүрүмнерни чүгле сактып алырынга эвес, а ону херек кырында канчаар ажыглаарынга база өөреткен. 💬 «Дыштанылга үезинде уруглар хөй кезиинде даштыгаа эрттирер болганда, оларга орук шимчээшкининиң дүрүмнерин сагындырары онза чугула. Кичээлдиң ындыг хевири дүрүмнерни чүгле шиңгээдиринден аңгыда, оюннар болгаш удур-дедир харылзаа таварыштыр херек кырында оларны ажыглаарынга өөредир. Бо арга уругларга айыыл чок чорук чурумун кезээде сактып алырынга дузалаар» - деп, «Айыыл чок чорук лабораториязының» специалистери демдеглээн. «Айыыл чок чорук лабораториязы» уруглар лагерьлеринге үнүүшкүннүг кичээлдерни база планнап алган. Уругларны тускай дериттинген шөлдерге солун мергежилгелер манап турар болгаш, кижи бүрүзү айыылдыг байдалдарда канчаар хөделирин катаптаар аргалыг. Дыштанылгаларны айыыл чок болгаш өөредилгени солун кылдыр эрттирери – кол сорулга бооп арткан. «Айыыл чок чорук лабораториязы» - уруглар-биле айыыл-халаптарны эвээжедиринче, оруктарга айыылдыг чүүлдерни болдурбазынче, орук шимчээшкининиң дүрүмнерин сагып чоруур культураны хевирлээринче угланган федералдыг төлевилел. Уругларның орук озал-ондаандан кемдеп-берттинерин эвээжедир дээн системалыг ажылдың бир кезээ – «Айыыл чок чорук лабораториязы»-биле профилактиктиг кичээлдер. Олар уругларга айыыл чок чоруктуң кол дүрүмнерин тайылбырлаарынга болгаш ындыг ышкаш байдалдар үезинде алдынарының чурумун ажыглап өөрениринге дузалаар. «Айыыл чок чорук лабораториязы» - кичээлдер эрттиреринге бүгү-ле херек техниктиг болгаш методиктиг, ооң иштинде машина, дериг-херекселдерлиг онзагай комплекс болурун сагындыраал. 2020 чылда Тывада ажылдап эгелээн лаборатория Россияда 47 дугаары болган. Мы в ВКонтакте | Мы в MAX