“Оҕону иитиигэ – үөрэтиигэ сахалыы эйгэни тэрийии” биир кэлим методическай күн
“Оҕону иитиигэ – үөрэтиигэ сахалыы эйгэни тэрийии” биир кэлим методическай күн Кулун тутар 18 күнүгэр улуустааҕы “Оҕону иитиигэ – үөрэтиигэ сахалыы эйгэни тэрийии” биир кэлим методическай күҥҥэ Тааһаҕар орто оскуолатыттан саха тылын уонна литературатын учуутала Каратаева Ольга Самуиловна, педагог – психолог Андреева Мария Захаровна көхтөөх кыттыыны ыллылар. Методическай күн сыала – соруга: оҕону сахалыы эйгэҕэ иитии – үөрэтии ньымаларын тобулуу, сахалыы өйгө - санааҕа уһүйуу, төрүт үгэстэри туттан саха тыынын киллэрии диэн билиҥҥи кэмҥэ сытыытык турар. Тэрээһиҥҥэ аһаҕас уруоктар, маастар кылаастар, кылаас таһынан дьарыктар араас хайысханан ыытылыннылар. Оскуолаҕа сэргэх быыстапка туруоруллан дьону – сэргэни сөхтөрдө манна бааллар оҕолор кыбытык тигиилэрэ, оҕуруонан оҥоһуктара, балык уҥуоҕун туһанан араас сиэдэрэй ойуулара, араас дьэрэкээн куукулалара ...уһуйааччы оҕону хайдах олоххо бэлэмниир биир улахан улэтэ буолар. Оскуолабыт педагог – психолога Мария Захаровна оскуола оҕолоругар 11 кылаастарга “Бэйэҕэ эрэллээх буолуу” диэн психологическай тренини ыытта. Оҕо бэйэтигэр эрэллээх, инникигэ сирдиир сыаллаах-соруктаах, талан ылбыт экзаменнарын ситиһиилээхтик туттаралларыгар эрдэттэн бэлэмнэнэн, бигэ туруктаах буолалларыгар туһуламмыт дьарыкка оҕолор сэргэхтик кытыннылар, бэйэлэрин санааларын сахалыы сайаҕастык этиннилэр. Дьарык кэмигэр учууталлар киирэн көрдүлэр, биһирээтилэр. Эбиэт кэннэ төгүрүк остуол тула олорон аныгы кэмҥэ оҕоҕо хайдах сахалыы эйгэни тэрийэр туһунан санаа атастастылар. Оскуолабыт саха тылын уонна литературатын учуутала Ольга Самуиловна “Саха тылын үөрэтии сүрүн кыһалҕалара” диэн үлэтинэн кытынна. Төгүрүк остуолга сүрүн болҕомто төрөппүккэ ууруллуоҕун ыйдылар, саха тылын оскуолаҕа үөрэтиини ырытыстылар, төрөппүт оҕотун кытта хайдах кэпсэтэрин, уол оҕону уол оҕо курдук иитиигэ болҕомто уурулларын ыйдылар. Түмүккэ, оһуохайдаатылар уонна балык аһылыктаах толору сандалынан кэлбит ыалдьыттары күндүлээтилэр. Улуустааҕы “Оҕону иитиигэ – үөрэтиигэ сахалыы эйгэни тэрийии” биир кэлим методическай күнү тэрийбит Лөкөчөөн орто оскуолатын үлэһиттэригэр махталбытын биллэрэбит.