Оскуолабыт үөрэнээччилэрэ улуустааҕы сүүрүү күрэҕэр ситиһиилээхтик кыттыыны ыллылар!
Оскуолабыт үөрэнээччилэрэ улуустааҕы сүүрүү күрэҕэр ситиһиилээхтик кыттыыны ыллылар! Бүгүн, кулун тутар 7 күнүгэр, Бүлүү куоратыгар оскуола оҕолоругар анаммыт Бүлүү куоратын баһылыга Ян Анатольевич Попов Кубогар сүүрүү күрэҕэ ыытылынна. Бу тэрээһиҥҥэ улуус араас оскуолаларыттан сүүрүүнү сөбүлүүр 190 эдэр спортсмен кыттыыны ылла. Биһиги оскуолабыт үөрэнээччилэрэ эмиэ бу күрэхтэһииттэн туора турбатылар, күүстэрин-кыахтарын холонон көрдүлэр. Оҕолор иккилии дистанцияҕа сүүрдүлэр: бары 60 миэтэрэҕэ уонна саастарынан арааран 200, 400 миэтэрэлэргэ. Биһиги оскуолабыт аатын ааттатан, 11 кылаас үөрэнээччитэ Айаал Шамаев 60 уонна 400 миэтэрэлэргэ сүүрүүгэ иккиэннэригэр үһүс миэстэни ылары ситистэ! Кини улахан дьулуурун уонна күүстээх санаатын, тулуурдаах дьарыктаныытын көрдөрдө. Бу ситиһии – кини эппиэтинэстээх үлэтин чаҕылхай түмүгэ. Ону таһынан, атын кыттыбыт оҕолорбут бары тус бэйэлэрин бириэмэлэрин тупсардылар, кыайыыга дьулуурдарын көрдөрдүлэр. Бу күрэхтэһии оҕолорбут чэгиэн туруктарын, чөл олоххо тардыһыыларын күүһүрдэр, дьулууру уонна тулууру иитэр сүрүн суолталаах. Эдэр спортсменнарбытыгар инникитин өссө улахан ситиһиилэри баҕарабыт! Кыайыылаахтары уонна бары кыттааччылары, кинилэри бэлэмнээн таһаарбыт салайааччыларын А.А. Иванову уонна Ф.А. Харлампьевы итиитик-истиҥник эҕэрдэлиибит!