Бэрдьигэстээххэ Саха Өрөспүүбүлүкэтин күнэ өрө күүрүүлээхтик бэлиэтэннэ.
Бэрдьигэстээххэ Саха Өрөспүүбүлүкэтин күнэ өрө күүрүүлээхтик бэлиэтэннэ. Муус устар 27 күнүгэр, Бэрдьигэстээххэ дойдубут ураты суолталаах күнүн өрө күүрүүлээхтик бэлиэтэннэ. Ол курдук Саха Өрөспүүбүлүкэтин күнэ «Историябыт – инники кэскилбит» бырааһынньыктааҕы тэрээһиҥҥэ дьон-сэргэ тоҕуоруһа муһунна. Үөрүүлээх тэрээһин Семен, Софрон Даниловтар паамытынньыктарыгар сибэкки дьөрбөтүн ууруутуттан саҕаланна. Салгыы тэрээһин кыттыылаахтара киэн туттар народнай суруйааччыбыт Софрон Данилов аатын сүгэр уулуссанан Саха сирин автономиятын олохтообут тумус туттар убайдарбыт мэтириэттэрин өрө тутан сэлэлээн хаампыттара бу ураты бэлиэ күн суолтатын күүһүрдэн бигэргэтэн биэрдилэр. Сахалыы таҥастаах сэлэлии хаамыы парадын иннигэр тимир көлөлөөх «Автоледи» түмсүү кэрэ аҥардара сахабыт сирин былааҕын иилинэн айаннаатылар. Тэрээһин үөрүүлээх чааһа Бэрдьигэстээхпит килбэйэр киинигэр Кыайыы Болуоссатыгар салҕанна. Бу күн улууспут баһылыга Н. В. Андреев, нэһилиэкпит баһылыга А. Г. Аргунов мустубут дьону-сэргэни үөрүүлээх күнүнэн эҕэрдэлээтилэр. Бу күн аһаҕас халлааҥҥа Илин Сибиирдээҕи Култуура институтун V кууруһун устудьуона Аделина Афанасьева дипломнай үлэтинэн "Үөрэх баар - бараммат баай" диэн театрализованнай дьүһүйүүнү туруоран, көрөөччүлэр сэҥээриилэрин ылла. История суолун-ииһин сэгэтэр дьүһүйүүгэ Бэрдьигэстээх норуодунай тыйаатыра, Афанасий Осипов, Семен Данилов ааттарынан орто оскуола тыйаатыр куруһуогун оҕолоро кыттыыны ыллылар. Бырааһынньыктааҕы тэрээһини Юрий Платонов аатынан эстрада театрын чаҕылхай артыыстара, биир дойдулаахпыт Ольга Спиридонова-Ника, Санита-Ай, Арчылаана, Эрчим, улууспут айар талааннаахтара "Айыллаана" вокальнай ансаамбыл, "Түһүлгэ" үҥкүү кэлэктиибэ "Тапталлаах Сахам сирэ!" диэн эҕэрдэ кэнсиэринэн өссө тупсаран, киэргэтэн биэрдилэр. Саха Өрөспүүбүлүкэтин күнүгэр аналлаах «Историябыт – инники кэскилбит» бырааһынньыктааҕы тэрээһин улахан Добун оһуохайынан түмүктэннэ. Оһуохайы таһаардылар Семен, Софрон Даниловтар ааттарынан Духуобунас киинин специалистара Лилия Тарасова, Прокопий Федоров. Бу курдук Өрөспүүбүлүкэбит күнүгэр «Историябыт – инники кэскилбит» диэн ытык өйдөбүлү толору арыйан, дьону-сэргэни түмэн, дойдуга тапталы уонна сырдык кэскилгэ эрэли бөҕөргөттө диэн эрэнэбит!