И.А. Федотовка аналлаах бэлиэ күн — 6 июня 2026 г. в 08:54:29.023
И.А. Федотовка аналлаах бэлиэ күн Бүгүн Болугурбут дьоллоох туонатыгар үтүө үлэһит дьиэ кэргэн, Болугур нэһилиэгин ытыктыыр, убаастыыр, киэҥ туттар сис ыала Анна Николаевна, Иннокентий Алексеевич Федотовтар дьиэ кэргэн үтүө ааттарын үйэтитэр дьоһун тэрэээһин буолан ааста. Аҕа дойду улуу сэриитин бэтэрээнэ, олоҕун тухары дойдум иһин диэн үлэлээбит үлэ бэтэрээнэ, «А5а дойду Улуу сэриитин сылларыгар килбиэннээх үлэтин иһин» мэтээллээх, Саха АССР норуотун хаһаайыстыбатын үтүөлээх үлэһитэ, «Бочуот знага» уордьан кавалера, потребкооперация туйгуна, Амма улууһун уонна Болугур нэһилиэгин бочуоттаах олохтооҕо - Федотов Иннокентий Алексеевич 100 сааһынан уонна кини тапталлаах кэргэнэ, 2 төгүл Коммунистическай үлэ ударнига, Сэрии сылларыгар килбиэннээх үлэтин иһин медээллээх, «Ийэҕэ албан аат» III степеннаах орденынан, элбэх грамоталарынан, юбилейнай мэдээллэринэн уонна Улуу Октябрьскай революция 100 сылыгар аналлаах өйдөбүнньүк мэдээлинэн наҕараадаламмыт Анна Николаевна Федотова сырдык мөссүөннэригэр анаан бу анал өйдөбүннбүк бэлиэ турда. Бу күн истиҥ эҕэрдэлэрин тиэртилэр Амма улууһун (оройуонун) баһылыгын тутууга солбуйааччыта Виктор Владимирович Смирниковы, Болугур нэһилиэгин тыа түөлбэтин баһылыга Андрей Никитич Петров уонна Иннокентий Алексеевич Федотов оҕолоро, сиэннэрэ, дьиэ кэргэнэ. Бэлиэ күнүнэн истиҥ эҕэрдэтин Федотовтар хос сиэннэрэ Давид Федотов, Валерий Кондаков суруйуутугар “Бүтэһик бэтэрээн” диэн хоһоонунан тиэртэ. Бу күн улуустааҕы СОДУОБА интеллектуальнай турнир ыытылынна. Уопсайа 26 киһи кыттыыны ылла, Амматтан, Болугуртан, Амма – Наахараттан, Чакыртан, Абаҕаттан. Сити курдук: 1 миэстэҕэ Пермяков Антон Назарович Абага нэһилиэгэ, 2 миэстэҕэ Назарова Ньургуйаана Степановна Абага нэһилиэгэ, 3 миэстэҕэ Степанов Михаил Ксенофонтович Амма нэһилиэгэ, 4 миэстэҕэ Аммосов Петр Николаевич Болугур нэһилиэгэ, 5 миэстэҕэ Гаврильев Валерий Иванович Амма – Наахара нэһилиэгэ. 1 миэстэ дьахталларга Попова Елена Николаевна ылла. Миэстэлэр таһынан анал ааттар туттарылыннылар: “Саамай саастаах оонньооччу” Бураев Иван Иванович, Сергеева Евдокия Прокопьевна буоллулар. “Саамай эдэр оонньооччу” Сережа Петров, “Көхтөөх оонньооччулар” анал ааты Никифорова Лариса Васильевна Устинов Иван Ильич ыллылар. Күрэх гылаабынай судьуйата Арассыыйа спордун маастара Пермяков Антон Назарович, күрэҕи иилээн – саҕалаан, тэрийдэ Иннокетий Алексеевич Федотов сиэнэ Аан дойдутааҕы гроссмейстер, дуобакка 2 төгүллээх аан дойду чемпиона, Амма улууһун бочуоттаах олохтооҕо Федотов Андрей Егорович Бэлиэ күммүт “Өйдүүбүт киэҥ туттабыт!” ахтыы киэһэтинэн түмүктэннэ. Ахтыы киэһэтин олохтоох библиотека үлэһиттэрэ тэрийэн, кэлбит ыҥырыылаах ыалдьыттарга Федотовтар аймах минньигэс астаах остуол, М.А. Ноговицын иһинэн үлэлиир “Сырдык” үҥкүү ансамбыла, “Мичийээнэ” ырыа ансамбыла кэрэ ырыанан киэргэттилэр. Субу курдук бэлиэ күммүт сүрдээх истиҥник ааһан, бар дьоммутугар барыгытыгар чэгиэн туругу, ситиһиини, дьоллоох олоҕу баҕарабыт.