Новикова Клавдия Алексеевна кылынан-сиэлинэн, туоhунан иистэниигэ Амма улууhугар биир ... — 3 июня 2026 г. в 06:03:21.986
Новикова Клавдия Алексеевна кылынан-сиэлинэн, туоhунан иистэниигэ Амма улууhугар биир бастыҥмыт, инники иhээччибит буолар. Саха тѳрүт ииhин пропагандиhа, уhуйааччыта, Саха Республикатын норуоттарын уус-уран оҥоhуктарын маастара. Кылынан-сиэлинэн иискэ ситии, салама хатыытыттан саҕалаан, сэлээппэни, сѳрүѳнү, дэйбиири, куйууру үрдүк хаачыстыбалаахтык тигэр. Туоhу бэлэмнээhини, таҥастааhыны, ойуулааhыны, иҥииртэн, сиэлтэн сап хатыытын, туос иhити тигиини - ѳбүгэ мындыр ииhин баhылаабыт, элбэх киhини, ыччаты үѳрэтэр-такайар маастар буолар. Клавдия Алексеевна уhуйуллааччыларын кытта айбыт-туппут үлэлэрэ Аммаҕа Айыы дьиэтин, улууска ыытыллар улахан ыhыахтары киэргэтэллэр, сиэр-туом ыытыллыытыгар туттуллаллар, хатыламмат эриэккэс тыыны олохсуталлар. 2017 сылтан ытык киһибит Борис Федорович Неустроев - Мандар Уус бырайыагынан уонна Баайаҕа уустарын, иистэнньэңнэрин ыңырыыларынан, Туос Моҕол ураһа тигиитигэр кыттыһар улахан чиэстээх, эппиэтинэстээх үлэни Амма улууhугар Клавдия Алексеевна иилээбитэ-саҕалаабыта. Баайаҕаҕа, “Мандар кыһата” айымньы, айылгы киинигэр хаста да тиийэн, иистэнньэңнэрбитин илдьэн, туоһу таңастыырга, тигэргэ үɵрэнэн, элбэх билии ылан кэлбиппит. Амма нэһилиэгэр Клавдия Новикова салайааччылаах туосчуттар түмсүүлэрэ курдуу, испэ, таспа туос тигиитигэр, Болугур нэһилиэгэр Ульяна Иванова салайааччылаах “Арчылаана” эбээлэр түмсүүлэрэ курдуу, таспа туос тигиитигэр иистэнэн, Улуу Кэрэ Туос Моҕол Ураһа тигиитигэр-таңыллыытыгар үлэлэспиппититтэн, Мэңэ Айымньы айыллыытыгар кыттыспыппытыттан олус үɵрэбит, киэн туттабыт уонна Клавдия Алексеевнаҕа дириҥник махтанабыт!