Болугур нэһилиэгэр Туос ураһа тутуута — 5 июня 2026 г. в 10:54:02.604
Болугур нэһилиэгэр Туос ураһа тутуута Болугур нэьилиэгэр 2015 сылтан «Кулун атах култуурата. Сырдыктааҕы кэм» бырайыак сөргүтэр, үйэтитэр, булуллубут култуураны киэн эйгэҕэ сырдатар сыаллаах улэлээн кэллэ. Бырайыак чэрчитинэн 2025 сылга «Олохтоох инициативаны өйөөһүн программатаза киирэн , биллиилээх норуот маастара, Саха сирин култууратын үтүөлээх үлэһитэ Борис Федорович Неустроев–Мандар Уус бырайыагынан «Туос ураьа» тутуутун үлэтэ саҕаламмыта. Ураһа сэргэлэрин, көҥдөйүн тутуутугар Болугур нэһилиэгин тутууга маастардара Алексей Юрьевич, Михаил Юрьевич Яковлевтар салалталаах, тутууга маастар Афанасьев Иван Иванович, Михайлов Феликс Николаевич, Аянитов Октябрь Валерьевич, көмөлөһөөччүнэн Альберт Вырдылин, Владислав Нестеров үлэлээбиттэрэ. Онтон ураһа туоһун таҥастааһыны, испэ, таспа туоһу тигиини Болугур нэһилиэгин «Туос Иис» иистэҥньэҥ эбээлэрбит, салайааччы Иванова Ульяна Ивановна уонна Амматтан Саха өрөспүүбүлүкэтин норуотун маастара Новикова Клавдия Алексеевна иилээн – саҕалаан үлэлэтэ сылдьаллар. Бу курдук «Туос ураһа» үлэтигэр нэһилиэк олохтоохторо, түмсүүлэрбит, тэрилтэлэрбит, түөлбэ олохтоохторо бука бары биир сыаллаах үлэбитин ситэрэ, олоххо киллэрэ дьулуһа сылдьабыт. Биьиги нэһилиэкпит иистэҥньэҥнэрэ Таатта Баайаҕатын «Моҕол ураһа» тутуутугар күүс – көмө буолан тиксибиттэрэ, баай уопуту ылбыттара. Ол иһин биһиги Болугурдар, Таатталары кытта ыкса ситимнээхпит, бииргэ үлэлиибит. Баайаза нэһилиэгин иистэнньэннэрэ бигиги Туос ураһабытыгар «Хаппахчы» тигэн үйэлээх үтүө үлэҕэ бэйэлэрин кылааттарын киллэрсибиттэригэр истиҥ махталбытын тиэрдэбит. Борис Федорович Неустроев – Мандар Уус хас да сыллааҕыта Болугур нэһилиэгэр кэлэ сылдьыбыт ахтыытыгар олус истиҥник аймахтарым, дьонум диэн суруйбутун ааҕан олус астынабыт уонна махтанабыт. Бу курдук хас да сыл Баайаҕалары кытта алтыһан Туос ураһабыт тутуутун түмүктүүр үлэбитигэр чугаһаан эрэрбитинэн үөрэбит. Бэс ыйын 25 – 26 күннэригэр Сайдар саргылаах Болугур нэһилиэгин үрүҥ Тунах ыһыаҕар, «Туос араҥас толуу ураһа» үөрүүлээх аһыллыытын биһирэмэ буолар. Сахабыт сирин дьонун – сэргэтин, ыалдьыттарын «Сардаҥалаах күн ыһыаҕын» сахалыы сайаҕас ыалдьыта буолуҥ диэн ыҥырабыт.