🌟 Малдьаҕар нэһилиэгэр Улуу Кыайыы 81 сыла үөрүүлээхтик ааста! 🌟 — 10 мая 2026 г. в 02:08:07.360
🌟 Малдьаҕар нэһилиэгэр Улуу Кыайыы 81 сыла үөрүүлээхтик ааста! 🌟 Аҕа дойду Улуу сэриитигэр Кыайыы 81 сылын көрсө, Малдьаҕар нэһилиэгэр дириҥ ытыктабылы, үйэлээх өйдөбүлү уонна түмсүүнү түмэр тэрээһиннэринэн үөрүүлээхтик бэлиэтэннэ. Ыам ыйын 8 күнэ: Киэһээ 20:00 чаастан "Ким да умнуллубат, туох да умнуллубат" диэн ааттаах кэриэстэбил аахсыйата саҕаланна. Бу киэһэ нэһилиэк олохтоохторо мустан, Улуу Кыайыы иһин олохторун толук уурбут дьоруойдарбыт ааттарын ахтан, чүмэчи уоттарынан кинилэргэ сүгүрүйүүбүтүн биллэрдибит. Ыам ыйын 9 күнэ — Улуу Кыайыы Күнэ! "Өлбөт Мэҥэ Полката" сэлэлээн хаамыы аахсыйаннан, тимир көлөннөн парадынан саҕаланна. Хорсун санаалаах сэрииһиттэрбит хаартыскаларын тутан, нэһилиэк олохтоохторо биир сомоҕо буолан, "Өлбөт Мэҥэ Полката" хаамыыга кытыннылар. Бу аахсыйаҕа хас биирдии киһи бэйэтин төрөппүтүн, эһэтин-эбэтин сэриигэ кыттыбыт дьоруойдуу быһыытын үйэтитэн, кинилэри хаһан да умнубаттарын көрдөрдүлэр. Бары хаамыы кэнниттэн, Улуу Кыайыы пааматынньыгар мустан, "Махтанабыт, ытыктыыбыт, сүгүрүйэбит" диэн дьоһуннаах миитин ыытылынна. Манна нэһилиэк дьаһалтатын аатыттан эҕэрдэ тылларын анаатылар: • Нэһилиэк аҕа баһылыгын солбуйааччыта Семенова Любовь Михайловна • Өр сылларга баһылыгынан үлэлээбит Иванов Никита Афанасьевич • "Чуораанчык" уһуйаан сэбиэдиссэйэ Кононова Мария Викторовна • Малдьаҕар орто оскуолатын дириэктэрэ Кириллин Артем Семенович • "Алаһа" эбээлэр түмсүүлэрин салайааччыта Афанасьева Надежда Михайловна Миитин кэмигэр эҕэрдэ нүөмэрдэр көрдөрүлүннүлэр. Ону тэҥэ, бу кэрэ бэлиэ күн атыы-эргиэн дьаарбанката уонна сэрии сылларын кэрэһилиир "Саллаат хааһыта" полевой куукуна үлэлээтилэр. Миитин кэнниттэн, ытык кырдьаҕастарбытыгар махталбытын биллэрэн, остуол тула ирэ-хоро кэпсэтэн, чэйдээн, эҕэрдэлэһэн аастыбыт. 13:00 чаастан 4-тэн үөһээ кылаас оҕолоругар анаан спортивнай күрэх ыытылынна. Кэлэр көлүөнэ Улуу Кыайыы буойуннарын хорсун санааларын илдьэ сылдьалларын көрдөрдүлэр. Күрэх түмүктэрэ: • 4-6 кылаас оҕолоругар: • 3 миэстэ - Самсонов Ньургустаан, 5 кылаас; • 2 миэстэ - Слепцов Борис - 4 кылаас; • 1 миэстэ - Потапов Руслан 6 кылаас. • 7-9 кылаас оҕолоругар: • 3 миэстэ - Тимофеев Артур , 7 кылаас; • 2 миэстэ - Иванов Алексей, 9 кылаас; • 1 миэстэ - Самсонов Николай, 8 кылаас. 18:00 чаастан "Улуу Кыайыы уостубат өрөгөйө" диэн кэнсиэринэн түмүктэннэ. Бу кэнсиэр сэрии ырыаларынан, хоһооннорунан уонна үҥкүүлэринэн толору буолла. Эйэ баар буоллун аан дойдуга! Улуу Кыайыыбыт үйэлэр тухары умнуллубатын!