16 нчы июнь көнне җәйге мәктәп янындагы 🌼"Ромашка" лагере балалары безнең Әтнә балалар... — 19 июня 2026 г. в 06:55:22.010
16 нчы июнь көнне җәйге мәктәп янындагы 🌼"Ромашка" лагере балалары безнең Әтнә балалар сәнгать мәктәбендә кунакта булдылар. Әлеге көн балалар өчен сәнгать дөньясына сәяхәт булды. Аларны төрле класслар буйлап алып барган остазлар һәр баланың күңеленә үз сәнгатенең җылысын салды. 🎨Рәсем остаханәсендә төрле төстәге буяулар аша балалар үз хисләрен кәгазь битенә күчерделәр. Алар дөньяны үз күзләре белән күреп, аны рәсемнәрендә чагылдырдылар — нәкъ менә шул мизгелдә һәр бала үзен чын рәссам итеп хис итте. 🪗🥁Музыка уен кораллары бүлмәсендә исә, балаларны моңнар дөньясы көтте. Алар тальянның якты тавышын, баянның аһәңле көйләрен, барабанның көчле ритмын тыңлап кына калмадылар, ә үз куллары белән тотып, төрле уен коралларында уйнап карадылар. Һәр баланың күзендә музыка дөньясына чумарга омтылуы күренеп торды. 🎼🎹 Шулай ук балалар фортепианоның барлыкка килү тарихы белән таныштылар, бу матур коралның эчке төзелешен карадылар, аның катлаулы, шул ук вакытта бик нәфис механизмын үз күзләре белән күрделәр. Фортепиано тылсымын аңлау аларда зур кызыксыну уятты, һәм фортепианода башкарган матур, классик әсәрләр тыңлап, сокланып утырдылар. 💃🕺Хореография залында исә, бию энергиясе, хәрәкәтләрдәге матурлык, ритм тойгысы белән алар төрле халык бию хәрәкәтләрен өйрәнделәр. Бию аларга үзләрен иркен, ирекле хис итәргә, хәрәкәтләр аша хисләрен белдерергә ярдәм итте. 🎶🎵🎤Вокал классында балалар көйләрне үзләре башкарып карадылар, ритмик алымнар белән таныштылар, көй тану буенча күнегүләр башкардылар. Һәр бала үзенең кечкенә концертын оештырды, ә күңелле җырлар залны шатлыкка, яктылыкка тутырды. 🎭Театр классында балалар үзләрен чын артистлар итеп хис итте. Алар төрле рольләргә кереп, кечкенә сәхнә бизәкләре, хәрәкәтләр, мимика ярдәмендә уйнап карадылар. Бу аларга үзләрен иркен тотарга, хисләрен ачык белдерергә, сәхнәдә яшәү рәхәтен тоярга ярдәм итте. Бу көн балалар өчен онытылмас тәэсирләр калдырды. 🌼"Ромашка" лагере белән Әтнә сәнгать мәктәбе арасында дуслык күпере ныгыды. Иң мөһиме — балалар сәнгатьнең могҗизасын, аның кеше күңеленә тәэсирен тойдылар. Алар сәнгатьнең — телдән дә көчлерәк, ул йөрәктән йөрәккә юл таба алуын аңладылар.. Сәнгать мәктәбе коллективы һәрвакыт мондый очрашуларның файдалы, якты, рухландыргыч булуына омтыла. Безнең өчен бу — шөгыль, ә балалар өчен — илһам. Безнең ишекләр һәрвакыт ачык! Тагын да яңа очрашулар көтеп калабыз!. #ӘтнәБалаларСәнгатьМәктәбе #АтняКультура #АтнинскийРайон #Таткультресурсцентр