Убаастабыллаах Сунтаар улууһун олохтоохторо!
Убаастабыллаах Сунтаар улууһун олохтоохторо! "Сунтаар улууһа (оройуона)" муниципальнай оройуон дьаһалтатын уонна оройуон Сэбиэтин депутаттарын ааттарыттан эһигини Төрөөбүт тыл уонна сурук-бичик күнүнэн, улууска тылга анаммыт декада саҕаланыытынан истиҥник эҕэрдэлиибит! Саха Ѳрѳспүүбүлүкэтин бастакы Бэрэсидьиэнэ Михаил Ефимович Николаев «Төрөөбүт тыл уонна сурук-бичик күнүн биллэрэр туhунан» 1294 № Ыйааҕа 1996 сыллаахха олунньу 9 күнүгэр тахсыбыта. Ити Ыйаахха олоҕуран, төрөөбүт сахатын тылын сайыннарыыга-чинчийиигэ олоҕун анаабыт, саха алфавитын төрүттээбит, бастакы лингвист С.А.Новгородов төрөөбүт күнэ - олунньу 13 күнэ - Төрөөбүт тыл уонна сурук-бичик күнүнэн биллэриллибитэ. Бу Күн олохтонуута Саха Сирин төрүт олохтоохторун төрөөбүт тылларын сайыннарыыга, бастакы саха үөрэҕин кинигэлэрин таһаарааччы Семен Андреевич Новгородов сырдык кэриэһин үйэтитэр, аатын ытыктатар соруктаах. Устар ууну сомоҕолуур уус-уран, мандар тыллаах өстөөх, айылҕаттан бэриллибит мындыр өйдөөх-санаалаах, талба талааннаах, сырдык ыраас санаалаах ытык өбүгэлэрбит эттэригэр-хааннарыгар ийэ тылларын иҥэриммит биллиилээх дьоммутугар сүгүрүйэн туран, кэнэҕэски кэнчээри оҕото кыра эрдэҕиттэн төрөөбүт буоруттан силис тардан, норуотун тылын, барҕа баайын, өбүгэтин үтүө үгэһин чахчы бааччы этигэр-хааныгар иҥэринэн, амарах сүрэҕин, мындыр өйүн, уран тарбаҕын утумнаан, сахалыы куттаах сүрдээх, дьоһуннаах киһи буола улааталларыгар анаммыт биир бэлиэ күммүт - «Тыл күнэ». Былыр-былыргыттан өбүгэлэрбит чочуйан-тупсаран кэлбит барҕа баайбыт - ийэ тыла буолар. Төрөөбүт тыл - киһи үөрэҕи-билиини кэбэҕэстик ылынар, өйө-санаата туругурар, майгыта-сигилитэ ситэр, иһирэх иэйиитэ уһуктар, өлбөт үйэлээҕи айар-тутар дьоҕура тобуллар айылҕаттан бэриллибит эйгэтэ буолар. Сахалыы сайаҕастык саҥарар, иэйиибитин истиҥник этинэр Ийэ тылбыт үйэлэргэ сүппэккэ үүнэ сайда турдун! “Сунтаар улууһа (оройуона)” МО А.В. Григорьев Сунтаар улууһун депутаттарын Сэбиэтин У.Д. Попова.