Үрүҥ Тунах ыһыах кыайыылара уонна дьоһун наҕараадалара! — 26 июня 2026 г. в 00:54:29.865
Үрүҥ Тунах ыһыах кыайыылара уонна дьоһун наҕараадалара! Арассыыйаҕа Норуоттар Сомоҕолоһууларын, Саха Өрөспүүбүлүкэтигэр Култуура, оттон Үөһээ Бүлүү улууһугар Үөрэҕирии ситимэ төрүттэммитэ 150 сылыгар анаммыт «Үөрэх-билии биһигэ – Үөһээ Бүлүү» диэн киэҥ далааһыннаах Үрүҥ Тунах ыһыахпыт чаҕылхайдык түмүктэннэ. Икки күн устата Үөһээ Бүлүү түһүлгэтэ ырыанан-тойугунан, спорт күөн-күрэһинэн, оҕо-аймах үөрүүтүнэн, эйэҕэс алгыһынан туолла. Ыһыах биир саамай күүрүүлээх уонна кэрэхсэбиллээх тэрээһининэн «Мордьонноохоп оонньуулара» сахалыы многоборьеҕа күрэхтэһии буолла. Саха эр дьонун күүһүн, сымсатын, тулуурдаах буолуутун көрдөрөр бу төрүт оонньууга бастыҥнар быһаарылыннылар: • Үһүс бириистээх миэстэни Манчаары оонньуутун кыттыылааҕа Игорь Иванов ылан, улуус дьаһалтата туруорбут 60 000 солкуобайы тутта. • Иккис миэстэҕэ Дүллүкү нэһилиэгин олохтооҕо, Аан дойдутааҕы Азия оҕолорун оонньуутун муҥутуур кыайыылааҕа, 4800 метрэҕэ өрөспүүбүлүкэ рекордсмена, чөмпүйүөнэ, Манчаары оонньуутун кыайыылааҕа Михаил Руфов таҕыста. Киниэхэ улуус дьаһалтатын аатыттан 80 000 солкуобай суумалаах сертификат уонна Далыр нэһилиэгин баһылыга Георгий Егорович Иванов анал убаһа бирииһи туттарылынна. • «Мордьонноохоп оонньууларын» муҥутуур кыайыылааҕынан Манчаары оонньууларын кыайыылааҕа, тутум эргииргэ өрөспүүбүлүкэ рекордсмена, Дыгын оонньууларын үһүс призера Айсен Ботуев буолла! Киниэхэ улуус дьаһалтата туруорбут 100 000 солкуобай суумалаах сертификаты уонна Үөһээ Бүлүү улууһун сахалыы оонньууларын федерациятын председателэ, индивидуальнай предприниматель Иванов Тимофей Анатольевич туруорбут 100 000 солкуобай суумалаах сертификатын туттардылар. Ону таһынан, Далыр нэһилиэгин баһылыга Иванов Георгий Егорович Айсен Ботуевка 60 000 солкуобай суумалаах эбии сертификаты уонна күлүмүрдүү сылдьар кыайыылаах курун туттарда! Айсен Ботуев дьиҥнээх эр бэрдэ буоларын өссө төгүл дакаастаата. «Үөрэх-билии биһигэ – Үөһээ Бүлүү» ыһыахха төрүт оонньуубут – оһуохай күөн-күрэһэ ытык тыыннаахтык ыытылынна. Дьону-сэргэни сомоҕолуур, куту-сүрүн көтөҕөр кэрэ түгэни түстээбит Аан Дархан оһуохайдьыт аатын Үөдүгэй нэһилиэгиттэн Розанна Герасимова ылла! Киниэхэ улууспут Аҕа баһылыга Валерий Николаев ытыктабыллаах оһуохайдьыт Анна Ивановна Алексеева-Оһуохай Аана анал бирииһин – убаһа сертификатын туттарда. Оттон үбүлүөйдээх ыһыах саамай тыҥааһыннаах, эрийсиилээх нэһилиэктэр икки ардыларынааҕы күрэхтэһиитин күүтүүлээх түмүгэ биллэриллэр долгутуулаах чааһа үүннэ! Икки күннээх ыһыах түмүгүнэн нэһилиэктэр икки ардыларыгар култуура уонна спорт көрүҥнэригэр күрэхтэһиилэр кыайыылаахтарынан буоллулар: • Үһүс миэстэҕэ ытык-мааны Нам нэһилиэгэ (баһылык А.И. Кардашевскай) тахсан, 100 000 солкуобайынан наҕараадаланна. • Иккис миэстэни дьулуурдаах Үөдүгэй нэһилиэгэ (баһылык А.Ю. Иванов) ылан, 200 000 солкуобайынан уонна кубогынан наҕараадаланна. • Оттон бу үбүлүөйдээх ыһыах муҥутуур кыайыылааҕынан уонна сүрүн бирииһин – УАЗ-микроавтобус – хаһаайынынан Үөһээ Бүлүү нэһилиэгэ (баһылык М.С. Силигиянов) буолла! Кыайыылаахтар массыыналарын ыһыах түһүлгэтигэр сүүрдэн киирэн, бочуоттаах эргиири оҥорон, Түгэхтэй алааһы үөрүү-көтүү, кыайыы-хотуу энергиятынан толордулар! Икки күннээх уруйдаах түһүлгэҕэ бириистэри туруорбут спонсордарбытыгар чааһынай предприниматель Иванов Тимофей Анатольевичка, «Алтан» ХЭУО-ҕа, чааһынай предприниматель Александра Александровна Александроваҕа, «Якутгазпроект» ХЭУО-ҕа, чааһынай предприниматель Николаев Эдуард Васильевичка, «Дьиэ кэргэн куукунатыгар», ону таһынан транспортнай, энергетическай тутуу хампаанньатыгар, чааһынай предприниматель Антонов Александр Ивановичка туспа тутан махталбытын тиэрдэбит уонна туох баар үтүөнү, махталлаах клиеннэри, оҥорон-тутан таһаарыылара табылла, ситиһиилэнэ турарыгар ис сүрэхпититтэн баҕарабыт! Галина Васильева #ҮрүҥТунахыһыах #Түбүктэртүмүктэр #Үөрэҕирии150сыла