Ээйик сэлиэнньэтин таһынааҕы баһаарга 120-чэ киһи уонна 17 тиэхиньикэ үлэлиир — 3 августа 2026 г. в 22:31:11.956
Ээйик сэлиэнньэтин таһынааҕы баһаарга 120-чэ киһи уонна 17 тиэхиньикэ үлэлиир Өлөөн улууһун Ээйик сэлиэнньэтигэр чугаһаабыт ойуур баһаарын умуруоруу үлэтэ бара турар. Умуруорууга 117 киһи, 12 вездеход уонна 5 массыына кыттар. Бу туһунан брифиҥҥэ СӨ Экологияҕа, айылҕаны туһаныыга уонна ойуур хаһаайыстыбатыгар миниистирин солбуйааччы, өрөспүүбүлүкэ кылаабынай лесничэйэ Андрей Коноплёв иһитиннэрдэ. «Бу иннинэ сэлиэнньэ хотугу уонна хотугу-арҕааҥҥы өттүтүгэр күөллэр ситимнэрин икки ардыларыгар охсуллубут тирэх балаһалартан өртөөһүн ыытыллыбыта. Билигин оттуллубут сири харабыллыыллар. Уот нэһилиэнньэлээх пууннар сирдэригэр барбатаҕын бэлиэтиибин. Бүгүн Ээйик күөл арҕаа өттүгэр баар оҕо лааҕырын көмүскээһин былааннанар», — диэн Коноплёв эттэ. Ааспыт сууккаҕа Амма, Нам уонна Өлөөн улуустарыгар уопсайа 25 304,5 га иэннээх 10 ойуур баһаара тохтотулунна. Суукка саҕаланыыта 12 улууска уопсайа 353 805 га иэннээх 72 ойуур баһаара турбута бэлиэтэнэр. Амма, Мииринэй, Кэбээйи, Лиэнскэй, Орто Халыма уонна Уус Маайа улуустарыгар уопсайа 78 788 га иэннээх 7 улахан ойуур баһаарын умуруоруу үлэтэ салҕанар. Ойуур баһаардарын умуруорууга бүгүн 333 киһи уонна 36 тиэхиньикэ тардылынна. Хонтуруол зонатыгар уопсайа 275 317 га иэннээх 65 ойуур баһаара турда. Хаартыска: Андрей Меженскай/«Якутия 24»