Бу дьыл олунньу 28 күнүгэр,Маҥааска Саха сиригэр биллэр эмчит,йог,кэрэ куоластаах ырыаһ...
Бу дьыл олунньу 28 күнүгэр,Маҥааска Саха сиригэр биллэр эмчит,йог,кэрэ куоластаах ырыаһыт,10 оҕо амарах аҕата Герасимов Семен Егорович-Ырыа Сэмэн төрөөбүтэ 75 сылыгар,Саха сиригэр култуура сыла биллэриллибитигэр аналлаах "Ырыа ыллаары"диэн региональнай ырыа күрэҕэ үрдүк таһымҥа ааста.Айылҕаттан айдарыылаах ырыаһыттар бу күн мааны Маҥааспыт олохтоохторун төрөөбүт дойдуга сүгүрүйүүгэ, айылҕа кэрэ көстүүлэригэр, таптал сылаас иэйиитигэр, сандал сааспыт тиийэн кэлбитинэн ырыа дьикти долгунугар көтүттүлэр.Алгыстаах күн ырыа дорҕооно дьикти күүс буолан тымныыга сылааһы, сиккиэргэ чуумпуну бэлэхтээтэ. Бииртэн биир ураты айылҕаттан талааннаах ырыаһыттар ыллаан — туойан эдэрдии эрчимнээхтик угуттаатылар. Барыта 29 кыттааччыттан,икки оҕо кытынна.Бүлүү улууһун Өкүндү,Балаҕаччы нэһилиэктэриттэн,кырылас кумахтаах Бүлүү куоратыттан ,улууспут Далыр,Мэйик,Быракан,Хомустах,Тамалакан Үөһээ Бүлүү сэлиэнньэтиттэн дьикти кэрэ куоластаах,ырыаны өрө туппут дьон чахчы да,дьол-ырыа түһүлгэтигэр мустан,олохтоохторго,ыалдьыттарга дьоро күнү бэлэхтээтилэр. Дьүүллүүр сүбэҕэ Саха Өрөспүүбүлүкэтин култууратын туйгуннара,ураты талааннаах култуура ветераннара Егор Егорович Егоров,Аграфена Алексеевна Долгунова,Дария Николаевна Павлова үлэлээтилэр.Семен Герасимовы-Ырыа Сэмэни кытта бииргэ үлэлээн,араас таһымнаах күрэхтэргэ кыттыбыт,гастролларга сылдьыбыт дьон буолан,кини репертуарын да сөбүлээн дьарыктанар йога номердарын,бэйэтэ айан оонньуур сыанкаларын,монологтарын элбэхтэ көрбүт буолан,дьүүллүүр сүбэ бу күннээҕи ырыаны-тойугу саамай сөптөөхтүк,көрөөччүнү астыннарар курдук дьүүллээтэ. Күрэх кэннэ Ырыа Сэмэн оҕолоро,сиэннэрэ өссө биир умнуллубат бэлэҕи биир дойдулаахтарыгар ууннулар.Сыанаҕа аҕалара баарын саҕаттан тэҥҥэ батыаккалаһан ыллаһа үөрэммит оҕолор,үөрүү-көтүү,дьол-соргу,кытаанах доруобуйа олоххутун арыаллаатын диэн алгыс тыллаах дьоһуннаах ,бэртээхэй кэнсиэр буолла.Манна оҕолор Россия хотугу многоборьеҕа спорт маастара,тыа хаһаайыстыбатын специалиһа,култуура дьиэтин уус уран салайааччыта,суол оҥоруу тэрилтэтин тутаах үлэһитэ,дьону таһыы сфератын үлэһиттэрэ да буоллаллар,ырыа куттаах ,бэйэ бэйэлэрин ситэрсэн биэрэр дьикти кэрэ куоластаах дьон кэнсиэрин ,көрөөччү хас биирдии ырыаны ытыс дохсун тыаһынан доҕуһуоллуу көрүстэ. Түмүк тахсан кыттааччыларга анал ааттар,дипломаннар,лауреаттар ааттара биир биир иҥэриллэн көрөөччү ытыһын тыаһынан доҕуһуолланан сынньалаҥ киин сыанатыгар өрө көтөн тахсан бириис,добун сурук туттулар. Күүтүүлээх муҥутуур кыайыылаах аата ааттанна-Бүлүү улууһун Өкүндү нэһилиэгиттэн Иван Данилов.Ханнык баҕарар күрэххэ көрөөччү сүрэҕэр,дууһатыгар иҥэриммит ,ис туругун таарыйтарбыт ырыаһыттаах буолар,"Көрөөччү биһирэбилэ"-Олег Петров Бүлүү куората диэн ааттаммытыгар ,саала иһэ үөрэн өрө ыстанан туран,эҕэрдээ диэн тэҥҥэ эҕэрдэлээн,ытыс дохсун тыаһынан таһынан ,кулууп ньиргийэ түстэ. Кыттааччыларбытыгар,Ырыа Сэмэн-Семен Егорович Герасимов оҕолоругар,Ырыа Сэмэн бииргэ төрөөбүттэригэр махталбытын тиэрдэбит.