Муус устар 10 күнүгэр Ньурба улууһун Акана нэһилиэгэр — 15 апреля 2026 г. в 08:07:43.599
Муус устар 10 күнүгэр Ньурба улууһун Акана нэһилиэгэр *"Сандаар, сааскы күн чаҕыла!"* сааһы көрсүү бырааһынньыга буолан ааста. Күнүс 2 чаас буолуута кулууп тэлгэһэтэ бырааһынньыктыы киэргэнэн, нэһилиэк дьонун сахалыы ылбаҕай ырыанан көрүстэ. "Акана нэһилиэгэ" ТСТ дьаһалтатын баһылыгын солбуйааччы Саргылана Васильевна Васильева мустубут бар дьону сандал саас кэлбитинэн эҕэрдэлээтэ. Оскуола, уһуйаан оҕолоро ырыа ыллаан, быыһыгар үҥкүүлээн, дьону-сэргэни сэргэхситтилэр, кэрэ куоластаах Саина Горохова ырыата, өрүү да буоларын курдук, истээччилэр сэҥээриилэрин ылла. Нэһилиэк тэрилтэлэрэ атыы-эргиэн дьаарбаҥкатын тэрийиигэ, көрдөөх стартарга күрэхтэстилэр. Иккис сылын оскуола алын сүһүөх кылаастарын уолаттарыгар "Сүүтүк Боотур" күүстээхтэр, быһыйдар күрэхтэрэ ыытылынна. Уолаттар сэттэ буолан сыалы мээчигинэн табыыга, мас тардыһыытыгар, сүүрүүгэ, ыараханы көтөҕүүгэ күрэхтэстилэр. Бэрт эриирдээх киирсиилэр кэннилэриттэн "Сүүтүк Боотур - 2026" ааты Дьулус Семёнов ылла, иккис үрдэлгэ Айсен Никифоров, үһүс үрдэлгэ Саян Захаров таҕыстылар. Уолаттар бары кыаналларын хайҕыы көрдүбүт уонна улааттахтарына нэһилиэкпит аатын дуораччы ааттатар дьон тахсыыһылар диэн испитигэр үөрдүбүт. Онтон 4 кылаастан саҕалаан хамаанданнан "кутурук былдьаһыыта" көрдөөх оонньуу ыытылынна. Түмүккэ Айтал Ефремов хамаандата 1 миэстэ, Арсен Иванов хамаандата 2 миэстэ, Тамерлан Шилеув хамаандата 3 миэстэ буоллулар. Оонньуулар быыстарыгар бибилитиэкэр В.Л.Павлова "Сонор суолунан" диэн өркөн өй күрэҕин ыытан дьон биһирэбилин ылла. Оскуола, олохтоох дьаһалта, нэһилиэк кыра тэрилтэлэрэ үлэтэ суох дьону холбонон көрдөөх оонньууларга күрэхтэһэннэр мустубут дьон сүргэтин көтөхтүлэр, 1 миэстэ оскуола, 2 миэстэ холбоһуктаах хамаанда, 3 миэстэ дьаһалта үлэһиттэрин хамаандалара буоллулар. Бу курдук кыракый нэһилиэк сандал сааһы уруйдуу, аламай күнү айхаллыы көрсөн биир сэргэх тэрээһин ыытылынна, өссө киэһэ кулууп дьиэтигэр Таркаайы нэһилиэгин талба талааннаах, айар куттаах эр дьоннорун кэнсиэрэ буолла. Биир идэлээхтэрбитигэр ыҥырыыбытын ылынан кэлэн нэһилиэкпит дьонун үөрдэн-көтүтэн барбыккытыгар барҕа махтал. Бүгүҥҥү тэрээһиммитигэр кыттыспыт, тэрийсибит, кэлэн көрбүт бар дьоммутугар, чуолаан күрэхтэри ыыппыт физкультура учууталларыгар Николай Барабанскайга, Георгий Новгородовка, тренербытыгар Александр Гороховка махтанабыт. Бары доруобай, дьоллоох буолуҥ. Олоххут сырдык, холумтаҥҥыт сылаас, дьиэ кэргэҥҥит иллээх, эйэлээх буоллун!