Быйыл Акана нэһилиэгэр 2026 сыл икки тумус туттар дьоммут төрөөбүттэрэ 100 сылыгар анаа... — 11 марта 2026 г. в 01:46:42.730
Быйыл Акана нэһилиэгэр 2026 сыл икки тумус туттар дьоммут төрөөбүттэрэ 100 сылыгар анаан Аҕа сылынан биллэриллибитэ. Өрөспүүбүлүкэҕэ култуура, улууска успуорт сыла биллэриллибитинэн, нэһилиэк түөлбэлэрин икки ардыларыгар култуура уонна успуорт эстафетата саҕаламмыта. Бу эстафета чэрчитинэн араас күрэхтэр ыытыллан иһэллэр. Ол курдук кулун тутар 6 күнүгэр Тойуктаах Марыына аатынан култуура уонна успуорт киинигэр Аан дойду дьахталларын күнүгэр аналлаах “Сааскы аламай күн алыбын сырдата" тэрээһин буолла. Тэрээһиҥҥэ нэһилиэк аҕа баһылыга Ефрем Михайлович Семенов бары мустубут кэрэ аҥардары бырааһынньыгынан эҕэрдэлээтэ, дьаһалта эр дьонноро ырыа ыллаан дьиэрэттилэр уонна Эр Хоһуун нэһилиэк эр дьоннорун түмсүүтүн аатыттан минньигэс торт бэлэх ууннулар. Дьэ уонна түөлбэлэр 5-тии киһилээх хамаанда тэринэн "Биэс бэһиэлэй кыргыттар" диэн күрэх ыытылынна. Бастакы түһүмэххэ түөлбэлэрин олоҕун-дьаһаҕын, киэн туттар дьоннорун туһунан кэпсээтилэр, мустубут бары кэрэ аҥардары эҕэрдэлээтилэр. Кэскил түөлбэ хаартысканан оҥорбут презентациялара дьон биһирэбилин ылла, тэрийээччилэр уонна түөлбэ салайааччылара инникитин хас биирдии түөлбэҕэ итинник түөлбэ олоҕун көрдөрөр презентациялары саҥардар наадатын бэлиэтээтилэр. Иккис түһүмэххэ дьиэлэригэр ас астаан аҕалан, туохтан, хайдах астаммытын кэпсээтилэр. "Эр киһи куртаҕынан" —диэн мээнэҕэ эппэттэр эбит өбүгэлэрбит, дьүүллүүр сүбэҕэ олорбут эр хоһууннарбыт саамай астыммыт, сэргээбит түһүмэхпит диэн билиннилэр. Үһүс түһүмэх ыйытыктарга хоруйдааһын. Кыттааччыларбыт бары сөптөөх хоруйдары биэрэн үөртүлэр. Аны төрдүс түһүмэххэ караоке ырыаны талан ылан ыллаан дьиэрэттилэр. Бары талыллыбыт курдук кэрэ куоластаахтарыттан сөхтүбүт, ыллам ырыалары истэн дуоһуйдубут. Аны бэһис түһүмэххэ араас кэмнээҕи муода көрдөрөн хааман намылыстылар, кэрэ симэхтэринэн, элэккэй мичээрдэринэн көрөөччүлэрин үөртүлэр. Тускул түөлбэ хамаандата 80-с сылларга этиллибит таҥастары, Кэскил түөлбэлэр аныгы дьахтар деловой таҥаһын, Кэнчээри түөлбэтэ аныгы саха омук таҥаһын көрдөрдүлэр. Бырааһынньыгы Саина Горохова, Данил Никифоров ырыаларынан киэргэттилэр. Түмүккэ Кэскил түөлбэ бастаан кыайыы кынаттаннылар, Тускул түөлбэ иккис, Кэнчээри түөлбэ үһүс миэстэ буоллулар. Күрэх кэнниттэн эр дьоммут минньигэс тортарын сиэн астаах сандалы тула олорон оонньоон-көрүлээн, оһуохайдаан дуоһуйа сынньанан тарҕастыбыт. Тэрээһиммитигэр кыттыспыт, сылдьан көрбүт бар дьоммутугар барҕа махтал буоллун. Доруобай, дьоллоох буолуҥ! Эһиги баар буолаҥҥыт, эһиги биһигини өйүүр, үлэбитигэр кыттыһар буолаҥҥыт - айабыт-тутабыт, үлэбитинэн толору дьоллонобут!