Олунньу 21 күнүгэр Тойуктаах Марыына аатынан култуура уонна успуорт киинигэр "Дьиэ кэрг... — 24 февраля 2026 г. в 07:16:32.466
Олунньу 21 күнүгэр Тойуктаах Марыына аатынан култуура уонна успуорт киинигэр "Дьиэ кэргэн тирэҕэ - эр дьон" диэн Аҕа Дойдуну көмүскээччилэр күннэригэр аналлаах тэрээһин ыытылынна. Түөлбэ кэрэ аҥардара кыттыһан ас буһаран сандалы тартылар, оскуола алын сүһүөх кылаастарын оҕолоро үҥкүүлээн дэгэйдилэр, чуопчаара ыллаатылар, хомустаан дьүрүһүттүлэр. Тэрээһиҥҥэ мустубут эр дьону уонна уоланнары баһылык Ефрем Михайлович Семенов бырааһынньыгынан эҕэрдэлээтэ, Акана нэһилиэгэр бу сылга Аҕа сыла биллэриллибитин иһитиннэрдэ, эр дьон нэһилиэк бигэ тирэҕэ, сайдыыны аҕалар күүс буолалларын санатта. Араас көрдөөх оонньуулар оонньоннулар, Саха сиригэр сыһыаннаах өй күрэҕэ ыытылынна, дартска күрэхтэстилэр, эр дьон, оҕолор ханнык тэрээһини сөбүлүүллэрин, уонна тугу ыыттарыахтарын баҕаралларын туһунан баҕа санааларын эттилэр. Ол курдук сайыҥҥы оҕолор оонньуур былаһааккаларыгар баскетболлуур сир баар буолуоҕун, футбол, спортинг күрэхтэрэ ыытыллыахтарын баҕаралларын уонна кыра саастаах оҕолорго сахалыы эйгэ тэриллиэн, элбэх сахалыы тыыннаах тэрээһиннэр ыытыллыахтарын баҕаралларын туһунан этиннилэр. Түмүккэ бары дуоһуйа сынньанан, махтал истиҥ тылларын түөлбэ кэрэ аҥардарыгар этэн, үөрэ-көтө тарҕастылар. Оттон биһиги бары кэлэн ыалдьыттаабыт уоланнарбытыгар, аҕаларбытыгар мэлдьи кинилэргэ анаан аан аһаҕаһын эттибит уонна көхтөөхтүк бары тэрээһиннэргэ кыттыҥ, доруобай, дьоллоох буолуҥ диэн алҕыы хааллыбыт. Түгэнинэн туһанан "Тускул", «Кэнчээри», «Кэскил» түөлбэлэр бары асчыттарыгар, кыттааччыларбытыгар махталбытын тиэрдэбит! Мэлдьи үөрэ-көтө сылдьыҥ, табыллыы таарыйдын, ситиһии сиэтистин, дьол иилии куустун!