Бүгүн олунньу 13 күнүгэр Тойуктаах Марыына аатынан элбэх аналлаах култуура уонна успуор... — 13 февраля 2026 г. в 20:47:28.800
Бүгүн олунньу 13 күнүгэр Тойуктаах Марыына аатынан элбэх аналлаах култуура уонна успуорт киинигэр төрөөбүт тыл уонна сурук-бичик күнүгэр сахалыы эйгэни төрүттүүр тэрээһин ыытылынна. Нэһилиэк биир тумус туттар киһитэ советскай-партийнай үлэһит, кыраайы үөрэтээччи Василий Николаевич Николаев - Куххата Баһылай төрөөбүтэ 100 сылыгар түөлбэлэр ыккардыларыгар "Төрөөбүт дойдубун туойабын" хоһоон ааҕааччылар күрэхтэрэ ананна. Тэрээһини баһылык Семёнов Е. М. хоһоонунан арыйда, бар дьонун ытык бэлиэ күнүнэн эҕэрдэлээтэ, оскуола алын кылааһын оҕолоро "Үрүйэчээн" фольклор бөлөҕө хомуска сахалыы матыыптары оонньоотулар, Кира Иванова туойан доллоһутта, уһуйаан иитиллээччитэ Марсель Андреев Мусьяна Сосина "Мин тылым-мин күүһүм" хоһоону ааҕан дьон сүрэҕин тутта. Түөлбэ аайыттан оскуола алын сүһүөх кылаастарыттан саҕалаан 50 саастарын ааспыт эбээлэргэ тиийэ алталыы киһи кытынна. Сэрэбиэй тардан ханнык түөлбэ бастакыннан тахсан ааҕарын быһаардылар. П. С.Егоров аатынан Акана орто оскуолатыгар саха тылын уонна литирэтиирэтин учууталлара Васильева Н. В. уонна Сергеева У. Н. дьүүллүүр сүбэ буоллулар. Бары кыттааччылар араас суруйааччылар сахалыы хоһооннорун үөрэтэн кэлэннэр аахтылар. Ааҕааччылар олохтоох айар дьон Ньукулай Чуор, Клара Васильева, Акана олохтоохторо Николай Афанасьев, Кристина Васильева хоһооннорун аахтылар. Түмүк тахсарын күүтэ таарыйа өс хоһооннору ситэрэн, таабырын таайан аралдьыйдыбыт. Түмүккэ бастакы миэстэ "Тускул" түөлбэ, иккис миэстэ "Кэскил", үһүс миэстэ "Кэнчээри" түөлбэ буоллулар. Бары кыттааччыларга туоһу суруктар уонна сэмэй бэлэхтэр туттарылыннылар. Бары кыттыбыт уйан дууһалаах ааҕааччыларбытыгар хоһоон хонуутугар хаамтарбыккыт иһин барҕа махтал! Көрдөөх көрөөччүлэрбит ыытар тэрээһиннэрбитин сэргээн көрөргүт, үлэбитин сыаналыыргыт иһин махтанабыт. Бары дьоллоох буолуҥ!