Библиотека нэдиэлэтин иһинэн былааннаммытынан бүгүн Токотооҕу "Кэскил" уһуйааҥҥа
Библиотека нэдиэлэтин иһинэн былааннаммытынан бүгүн Токотооҕу "Кэскил" уһуйааҥҥа "Кыһыл Бэргэһэчээн" остуоруйаны оҕолорго көрдөрдүбүт. Уһуйаан үлэһиттэрэ сүрдээх эйэҕэстик көрсөн, иитиллээччилэрин актовай саалларыгар киллэрэн олортулар. Интэриэһиргээн үлэһиттэр бары көрөөрү муһуннулар. Кырачааннар остуоруйа эйгэтигэр киирэн, кинилэр ис санаалара, уйулҕалара уонна тас көрүҥнэрэ букатын уларыйа түстэ. Оҕолор остуоруйаны олус сэргээн, сэҥээрэн көрдүлэр. Сүрүн герой Кыһыл Бэргэһэчээн тахсан үҥкүүлээбитигэр үөрэн ытысчааннарын таһыннылар. Бөрө кэлэн эбэлэрин сиэбитигэр им-дьим бардылар. Бөрө оҕолорго чугаһаабытыгар куттанан ытааччы да баар буолла. Остуоруйа бүтүүтэ масчыт (дровосек) кэлэн эмээхсиннээх Кыһыл Бэргэһэчээни быыһаабытыгар оҕолор долгуйан ытыс таһыннылар, үөрдүлэр, дьоллоохтук күллүлэр, оҕолор улаханнык «уоскуйан», сүргэлэрэ көтөҕүлүннэ. Бу — үөрүү саамай үрдүкү чыпчаала. Бу остуоруйа көмөтүнэн оҕолорго олоххо куттала суох буолуутун (безопасность) сүрүн быраабылаларын өйдөтөр иитэр-үөрэтэр сыаллаах талбыппыт: - Ийэ, аҕа тылын истиэххэ наада. - Билбэт дьону кытта кэпсэтиэ, кинилэр эппит сирдэригэр барыа суохтааххын. - Ойуурга (уулуссаҕа) соҕотох сылдьар кутталлаах диэн өйдөбүллэри биэрээри. Түмүгэр оҕолору кытта остуоруйаны ырыттыбыт уонна уопсайга хаартыскаҕа түстүбүт. Оруолу толордулар: Кыыс ийэтэ - Корнилова А.И. Кыһыл Бэргэһэчээн - Михайлова В.Б. Бөрө- Худаева С.М. Кыыс эбэтэ - Сектяева Т.П. Масчыт -Корнилова А.И.