👵 Хочоҕо бэтэрээннэр оҕолорго анаан күнүскү оскуоланы астылар — 13 августа 2026 г. в 07:38:55.522
👵 Хочоҕо бэтэрээннэр оҕолорго анаан күнүскү оскуоланы астылар 👩🦳 Бу күннэргэ Хочоҕо нэһилиэк бэтэрээннэрин көҕүлээһининэн (салайааччы Л.К.Петрова) оҕолорго күнүскү лааҕыр үлэтин саҕалаата. 🚸 Лааҕырга барыта 18 оҕо суруйтаран кэллилэр. Ыһыахтыыр сиргэ трибуна иннигэр үөрэх бастыҥнара лааҕыр былааҕын таһаардылар. Салгыы бэтэрээн учуутал Елена Петровна Прокопьева лааҕыр туох сыаллаах-соруктаах тэриллибитин билиһиннэрдэ. Оҕолор нэдиэлэ устата икки-үс чаас дьарыктаналлар. Бэтэрээн учууталлар күннэринэн үллэстэн сахалыы араас бэсиэдэлэри оҥоруохтаахтар. Саха үгэһин, оонньууларын үөрэтиэхтээхтэр. 👵 Бастакы күн ыалдьыттарынан РФ үлэ бэтэрээнэ, СӨ үөрэҕириитин Бочуоттаах бэтэрээнэ, ыстаарсай учуутал, 2-с Наахара нэһилиэгин Бочуоттаах гражданина Екатерина Ивановна Кычкина, өр сылларга Мииринэй куоракка эбии үөрэхтээһин эйгэтигэр үлэлээбит бэтэрээн иитээччи, «СӨ үөрэҕириитин мэтэдьииһэ» бэлиэлээх Ренальда Николаевна Суворова буоллулар. Е.Н.Кычкина оҕолорго «Дойдум дьоно» тиэмэҕэ баай ис хоһоонноох бэсиэдэни оҥордо. Латыынныы алпаабытынан суруллубут сэдэх кинигэни көрдөрдө. Английскай тылы үөрэтэр буолан Дьокуускай куорат «Айыы кыһата» оскуола үөрэнээччитэ Арылхан Бурнашев иҥнигэһэ суох ааҕан бэтэрээн учууталы үөртэ. Р.Н.Суворова Наахара оскуолатыгар аҕата Н.С.Негнюров дириэктэрдиир кэмигэр начаалынай кылаастарга үөрэммит эбит. Кини Наахараны олус күндүтүк саныыр буолан анаан-минээн күүлэйдии кэлбит, оҕолорго анаан кылгас ахтыыны оҥордо. 👨👩👧👦 Лааҕыр бастакы күнэ сахалыы оонньуунан түмүктэннэ. «Күн дьоруойдара» былааҕы түһэрдилэр. @gazetaerkeii @ulusmedia