Вестник образования Мегино-Кангаласского улуса
Образование · 27 сентября 2026 г.
Ытыктабыллаах бэтэрээннэр, иитээччилэр, уһуйааннар бары үлэһиттэрэ!
Ытыктабыллаах бэтэрээннэр, иитээччилэр, уһуйааннар бары үлэһиттэрэ! Улуустааҕы үөрэҕирии салалтатын, үөрэҕирии үлэһиттэрин улуустааҕы территориальнай тэрилтэтин аатыттан эһигини идэлээх бырааһынньыккытынан итиитик-истиҥник эҕэрдэлиибит! Хас биирдии киһи олоҕун оҥкула оҕо сааска ууруллар. Улаатан, сааспытын ситэн баран оҕо сааспытын истиҥ иэйиилээхтик ахтабыт: төрөөбүт алаһа дьиэбитин, сүүрбүт-көппүт кырдалларбытын, эн-мин дэһиспит оҕо сааспыт доҕотторбутун. Оҕо сааспытыгар биһиги күн бүгүн илдьэ сылдьар сыаннастарбытын, сиэрбитин-майгыбытын, үгүс билиибитин-көрүүбүтүн, сатабылларбытын иҥэриммиппит. Дэлэҕэ даҕаны улуу бөлөһүөкпүт Мандар Уус «Оҕо айылҕаттан сурулла илик ыраас кинигэ курдук үоскүүр. Кэлин ол ыраас кинигэ хайдах ис хоһоонунан туолуута төрөппүттэртэн, оскуолаттан, бары тулалыыр эйгэттэн тутулуктаах»-диэн этиэ дуо? Оҕо дууһата иитиини-үөрэтиини кыратыгар иҥэримтиэ, ылынымтыа буолар. Онон оҕону уопсастыбаҕа киллэрии, оскуолаҕа бэлэмнээһин, дьоҕурдарын сайыннарыы, личность быһыытынан иитии-такайыы соругун толорууга дьиэ-кэргэҥҥэ көмөлөһөөччүнэн оҕо саада-уһуйаан буолар. Судаарыстыба, анал үөрэхтээх, уопуттаах иитээччилэр бу соруктары толорууга күннэтэ кыһамньыларын уураллар. Биһиги улууспутугар быйыл бастакы оҕо былаһаакката тэриллибитэ 100 сылын бэлиэтиибит. Онтон Российскай Федерация Үөрэҕириитин министиэристибэтэ 2026 сылы оскуола иннинээҕи үөрэхтээһин сылынан биллэрбитэ биһиэхэ икки төгүл эппиэтинэс. Оскуола иннинээҕи үөрэхтээһин сыла – биһиги оҕолорбутугар туох нэһилиэстибэни хаалларарбыт туһунан толкуйдуур сылбыт буолуохтаах. Биһиги саамай күндү дьоннорбут-көмүс чыычаахтарбыт кэрэ кэскиллэрин туһугар былаас, педагогтар, төрөппүттэр, уопсастыба өйбүтүн-санаабытын, кыахпытын түмэн бииргэ үлэлиэхтээхпит. Сахалыы куттаах-сүрдээх, тыллаах-өстөөх, өйдөөх-санаалаах, айылгылаах, уйулҕалаах оҕону биир санаанан иитиэхтээхпит. Күндү кэллиэгэлэр! Кыра оҕону көрүү-харайыы, иитии-үөрэтии – бу идэ эрэ буолбатах, бу анал. Күннэтэ эһиги кырачааннары бүөбэйдээн, уоскутан, саҥаттан саҥанан интэриэһиргэтэн, кинилэр хас биирдии күннэрин кыракый остуоруйаҕа кубулутаҕыт. Иитээччи оҕо кэскилин түстээччи буолар, эһиги оҕоҕо билии-көрүү дойдутугар маҥнайгы хардыыларын оҥороругар көмөлөһөҕүт, доҕордоһорго, айарга-тутарга үөрэтэҕит. Эһиэхэ идэҕэ бэриниигит, тулуургут, оҕоҕо муҥура суох тапталгыт иһин махтанабыт. Хас биирдии үлэҕит күнэ үөрүүнү эрэ түстээтин, кырачаан киһи мичээрэ, үөрбүт хараҕа, төрөппүт махтала эһиги үлэҕит үрдүк сыанабыла буоллун! Чэгиэн туругу, байылыат олоҕу, толору дьолу тус бэйэҕитигэр уонна чугас дьоҥҥутугар баҕарабыт. Кэлэр кэскилбит- кэнчээри ыччаппыт, кырачаан оҕолорбут инникилэрин түстүүргэ, дойдубутун- норуоппутун ааттатар дьону иитэн таһаарарга күүспүтүн түмүөҕүн, бииргэ үлэлиэҕин! Улуустааҕы үөрэҕирии салалтатын начаалынньыга И.М.Плотникова Үөрэҕирии үлэһиттэрин улуустааҕы территориальнай тэрилтэтин бэрэссэдээтэлэ И.М.Скрябин